意國晒冷大起阿爾巴尼亞

猪拉多纳

狂牛重召迪哥勢炒以色列

世盃外圍賽歐洲區G組，兩大名牌西班牙、意大利「擺大個頭」分途出擊玩大佢！「鬥牛兵團」領隊洛佩特吉重召兩位車路士前鋒迪亞高哥斯達、柏度洛迪古斯，主場強攻以色列，屬於大炒格，直取讓球主勝。（有線61及201台周六凌晨3時45分直播）。意大利主帥雲杜拿更加搵咗8位前鋒入伍，準備排出424主攻陣式，主場轟炸阿爾巴尼亞，但意軍防線人腳不整有暗湧，最好揀入球大。

（有線62及202台周六凌晨3時45分直播）
西班牙主場例炒對手

西班牙一向有「外圍賽之王」稱號，尤其係主場出擊，必然殺無赦；計埋上屆歐國盃外圍賽，近7次大賽外圍賽主場全勝，其中5場大炒對手3球或以上，包括今屆世界盃外圍賽狂數列支敦士登8比0，以及大炒馬其頓4比0，可見「鬥牛兵團」即使對弱隊都唔會留力。

不過領隊洛佩特吉似乎嫌未夠喉，今次重召迪亞高哥斯、柏度洛迪古斯，加上艾華路莫拉達、大衞施華、恩尼斯達等猛將，中前場人腳更加完整，以色列實在難以招架。今場作客嘅以色列對上1次打入世盃決賽周，已經係1970年，實力亦低過西班牙幾班波。此外，以色列由中東地區遠赴西歐比賽，飽受舟車勞頓之苦，未開波先打八十大板，今場大敗唔出奇。

另一場意大利對阿爾巴尼亞，雲杜拿上年夏天接過意大利帥印後，銳意改革鋒線，除咗堅持唔選巴洛迪利之外，仲棄用得罪過佢嘅加斯安奴柏利，繼而提拔拖連奴新星比洛迪，呢位23歲射手今季意甲已轟入22球，再加上恩莫比尼、恩斯治尼、尼高拉辛桑尼等前鋒同樣有出色表現，手上大把進攻人選。
意大利防線有隱憂

雲杜拿之所以徵召8位前鋒，原因係希望大踢佢最喜歡嘅424陣式，強攻阿爾巴尼亞，但要留意軍「BBC」防線，基亞連尼因傷落選，邦路斯亦有傷在身上陣成疑，得番35歲老將巴沙利支撐大局，防線未必靠得住。如果意大利壓得太前搶攻，阿爾巴尼亞隨時有可能偷襲得手，所以最好捧大盤。