馮諾嘉手記：再來風強配交代

魑魅魍魉

　　韋達停賽四日，柏寶真係夠晒落力，響呢四日合共贏咗九場頭馬，剛戰更一開波直落贏四場，手風大順。依家柏寶累積79場頭馬，多過第二位嘅韋達6W，雖然數字上唔係拋離好遠，但若然兩位都冇再停賽，響大家各有支持之下，韋達要過佢都唔容易，即管睇吓聽晚佢哋點樣鬥。

　　第二場四班1200米，小妹用「再來風」做膽，呢隻馬跑過多場，唯一頭馬就響四班同程取得。季初不斷大敗減分，到前仗落四班跑已開始接近，上仗跑番谷草1200米更只係輸畀頭馬「成功網絡」四分三馬位，今次強配柏寶，睇嚟都係贏馬交代時候。

　　配腳方面，「神力金剛」近兩場都有接近演出，當然要吼實。「八哥福星」上場已證明四班夠爭，唔可以睇小。「金大人」今季仲未交代，鬥志一定有，四連環拖埋匆匆再出嘅「威威財星」。

　　第五場三班1000米，小妹鍾意摩廐「勁勇士」，近兩仗響同程打叠贏馬，姿態仲一次比一次輕鬆，三歲馬愈跑愈進步，今次繼續跑番贏馬路程，睇唔到有任何爭勝阻力，可作為今場重心。

　　對手方面，「星光活力」近兩仗響同程非勝即位，今場客觀條件同上場差唔多，會繼續接近。「同心威駿」上場輸咗之後，小休個幾月回一回氣，近期狀態似乎醒神番，應該會有唔同演出。冷門吼「尚駿心」，雖然實力睇晒，但勝在抽到黃金一檔，一敲無妨。「喜萬家」落番三班即刻強配韋達，肯定有心出擊，雖然抽到十一檔唔易發揮，但都唔能夠睇小。