馮諾嘉手記：勝利雄威夠料冧莊

魑魅魍魉

　　噚日講過柏寶乘韋達停賽四日全力搶攻，期間贏成九場頭馬咁多，今晚韋達刑滿復出當然會反擊，但論到坐騎整體實力，柏寶騎足八場之餘，有多場被捧成大熱門，騎師王開飛更熱到只得一點幾倍，韋達就有成六個開，反映唔少人都睇好柏寶，噚日提過「再來風」勝算大，今日三場精選亦全部用柏寶嘅馬做膽。

駕馭內檔收復前失

　　第四場四班1650米，「駕馭」今季經過不斷減分，上場跑同程終於使出真功夫，可惜抽排大外檔，早段三叠競跑兼冇遮擋，結果只以短頭馬位輸畀貼欄守好位嘅「歐洲駿馬」，假如上場抽到好檔，分分鐘已經贏咗，今場配柏賽，檔位內移，應可補中。配腳方面，「蓋世子牙」上場同樣係跑第二，輸畀大熱門馬「勝任有餘」，谷草表現特佳，六戰谷草場場入位，未交代實好鬥志。「天之驕子」最近三場跑田草1600米不勝有位，狀態當勇，今場初跑谷草，有運抽到黃金一檔，前列分子。「七星仔」前次跑一哩輸唔遠，有分頭不妨拖埋。

　　第六場三班1200米，「輕輕鬆鬆」上場插班初出已經跑第二，快放之下只係以短頭馬位輸畀「大旋風」，今場操足再出，試埋大閘，柏寶摸到實，排二檔大可貼欄跟喺領放馬後面，相當好跑，呢場再遇「開心動力」同「大旋風」，「開心動力」大前仗同「輕輕鬆鬆」同場跑第三，亦只係輸頭馬頸位，「大旋風」前次後上奪冠追勢凌厲，不過，「開心動力」同「大旋風」最近連場硬仗，論狀態都係「輕輕鬆鬆」較為優勝，做膽穩陣。配腳拖埋「祥勝愛駒」，前仗贏過同程，上場則輸在磅重，今次負磅減輕，應有唔同演出。

　　第八場三班1650米，「勝利雄威」雖係七歲老馬，上場落四班跑兼強配柏寶，雖然負重磅上陣，仍可以輕勝對手成兩個幾馬位，轉投文家良馬馬房後狀態已回勇，底質優厚，上番三班有權再贏。配腳先拖上場初跑同程即得第二嘅「雄風」，其次係近仗跑同程不勝有位嘅「馬風雲」，「旅遊小子」上場雖然落敗，實際只輸頭馬兩個馬位，今場亦要兼顧。