洪禮賢講馬：再來風賺形勢

魑魅魍魉

　　韋達復出，但柏寶目前強勢到不得了，自停賽復出之後，從未有一期冇馬贏，像上期仲４Ｗ到手，所以，前者未必喺呢期即刻有本事追番近，目標應留在周日賽事吧，呢次行程仍睇阿寶高啲。

重心場次

第4場  第四班（60-40分）1650米

　　駕馭前仗已吼住，可惜前中段取位冇配合，斷送了機會，但勢估唔到上場可在劣勢幾乎贏到（沿途三叠兼過早發力），看來收無可收了。呢次繼續跑主項，出動到柏寶，睇嚟好想為呢匹接近兩年冇Ｗ嘅馬交代。

　    「蓋世子牙」冇咩唔好，只係擔心兩點，其一，上場加罩係前跟力好咗，拉士卻爆得冇咁勁，其二，如地慢，佢啱唔啱追真係要估﹗﹖「天之驕子」唔介意係棄騎，總之當弗之際，班次壓力對佢冇影響。

    　「好友緣」表面上係三零部隊，好似冇賣點，惟上賽直路滋滋油油也湧得唔錯，肯再跑此程，配搭強番，抵博。「寶威威」大外檔影響好大，早段未必泊到好位，咁就企晒喺度。「電訊高星」匆出冇問題，分利馬可能一經開氣後即到位，唔敢睇小。

第1場  第五班（40-10分）1200米

　　智勝寶上場入Ｑ的賽績要尊重，始終之前跑親谷草都唔入前四名，實在剛仗直路如非前路受妨礙，入Ｑ過程唔會咁掹掹緊﹔增程跑1200米冇理由唔啱，而呢場多馬搶放更會利追，值得再跟。「甜蜜至上」在此班不論短途或中程也有強大殺傷力，尤其隔了一輪，縮程仲好。

　    「大勇」近績太曳，12檔加埋重磅，就算落班也不敢看重。「勁多勝」配搭完全唔似樣，檔好亦有戒心。「秒秒領先」績靚，再加磅縱有壓力亦難睇小。「分享」、「大情大勝」及「莎朗之寶」，擔心形勢唔夾，限於爭腳。「特別靚」向來慢閘，要承受好大風險。

第2場  第四班（60-40分）1200米

　　再來風一直教唔到留力追，所以落班後仍非超級馬，尚幸今次好檔易守有利位置，希望慳慳埋埋，直路鬥檻贏得到。「揀得準」季中陷入低潮，好在近兩場已跑得好番，既然剛仗C+3欄11檔都跑得好，跑番A欄應更具侵略性。

    　「神力金剛」如果排內檔，一定搵佢做馬膽，蓋近三兩場俱因際遇才影響名次。「八哥福星」好似同廐侶「七星仔」調轉了路程嚟報﹖﹗「麗晶之星」和「好順利」試閘留下不錯印象，可敲。「金大人」上場的第五名水準ok，因頭四名有3駒係三班評分之馬。

第3場  第四班（60-40分）1200米

　　好玩連續3場此程跑入三甲，論可觀性以剛賽最得，放唔出尚可在拉士展示纏鬥力，似乎能力稍比前升級﹔望落今場除咗佢，好似冇咩馬會快，應可輕易攞到領導地位，苟如是，有權放到。「皆大歡喜」貼了3次都贏唔到，驚佢呢次又係相同命運，但計馬梗係惡。

　    「新薪」四班幾惡，有埋1檔，就算重磅都要吼住。「奔騰飛駒」上場其實係賺晒，可能一哩略長，攤薄了後勁，跑短或會幫到。「駿盈」長近而無威脅，限爭三三四四。「百利旺」係驚腳傷復出首回合未十足。「齊勝」始終仍是新嫩，好檔易於順應陣上形勢，計馬則在此班微超。

第5場  第三班（80-60分）1000米

　　勁勇士愈贏愈叻，今場所遇對手唔覺比上場增強，如非9檔令陣上際遇欠佳，不難三捷。「尚駿心」剛仗因慢閘影響發揮，但早已地莊見晒，好在今次檔好，希望沿途賺晒腳程會有三甲。

　    「喜萬家」、「星光活力」與「同心威駿」皆要擺前，但除了跑法相沖之外，彼此排晒外檔也令能力大打折扣，冇冠軍相，位置居多﹗「延續美麗」加罩又縮程跑 1000米，未必唔得。

第6場  第三班（80-60分）1200米

　　開心動力向來唔怕匆出，而上場好明顯係放得過急才冇Ｐ，今場用韋達（騎練谷草合作上名率達77%），又回到未失三甲的路程，或可補中。「輕輕鬆鬆」外地有罩贏過兩W，在港首戰冇配備都幾乎贏到，呢次冇理由加配件會有反效果。

　    「跑得叻」係擔心4月中缺課的後遺症。「金紫荊」賽事形勢已不如剛賽般着數。「浚鋒天河」唔鍾意短時間縮程，恐一時適應不來。「大旋風」路程專家，地淋又掂，正路配腳。「紅褲子」季尾有番狀態，已站於勝利邊緣。「金獅駿將」評分冇壓力，如因應好檔用到最啱嘅守好位戰略，唔排除有Ｐ。

第7場  第一班（105-80分）1000米

　　寶樹友盈卡士略秤先，但未至於一面倒，好處係跑法機動，同埋近期試閘吸引。「孖寶神駒」大有廐侶「愛拚者勝」的影子，做好晒對準主打項目，十幾倍博得過。

　    「精彩生輝」1000米太短，追唔追得切成疑，與及呢對組合未好過（騎練季內合作0﹕24）﹖「桃李滿門」分數差唔多到頂，不過回到此程競爭力會升級。「龍武軍」輸級數但磅輕，爭三至五名﹔「開心風采」情況則調轉。

第8場  第三班（80-60分）1650米

　　勝利雄威如果真係養得番，殺番上三班未必驚，在六十餘分水平依然大利。「雄風」剛仗的第二名有指標性，一來，拉士時間快（當日4場一哩最快），二來，壓倒「海力童」唔係易。

　    「旅遊小子」外檔或令發揮綁手綁腳。「精算攻略」跑法自由度大，11檔也冇所謂，計實力在此唔輸蝕。「馬風雲」只係近績穩，但呢個磅已唔易贏。「福到多多」回班即遇阻力，可能未消化評分升幅。「帝豪龍駒」上場好位下連Ｑ都冇，大致失望。