高清睇跑馬：松林之星拉士勁

魑魅魍魉

　　今季總場次472四草四班1400米，「松林之星」起步唔快，全程守在尾四、五位，貼欄跟住「金津勝」，轉彎中段後駒走出二、三叠，「松林之星」順勢跟前，繼續貼欄跟住「新薪」，入直路後「新薪」衝刺勁平，蔡明紹惟有抄出外叠追，可惜前邊有隻「旺舖福星」，更弊外邊又有「金津勝」，結果慘坐包廂，直到二百米才望空，如此劣勢僅以頸位不敵再出再贏的「旺舖福星」，且末段締速快至廿二秒九，是同場唯一造廿三秒內之馬，今次養精蓄銳跑1200米，可放心追捧。

　　另於季內總場次573田草四班1200米，「好利利」十二檔起步，潘頓首次策騎，加上負頂磅出戰，一樣被捧到十六蚊咁誇張，出閘已應聲彈出，但潘頓留以有待，只是順勢跟前及切入二叠，由於「延續美麗」轉彎不久埋欄，令「好利利」全程沒有遮擋，入直路繼續咬住「霹靂槍」等前領馬，潘頓或許見其反應不俗，過了四百米才推騎，最後二百才打鞭，但此駒是均速馬，爆發力不強，負重磅更成致命傷，結果大熱撻Q，僅獲季軍，但仍跑出一分九秒八，比起之前贏馬已進步不小，且時間竟與同日贏二級賽的「極奇妙」睇齊，今次上三班負磅減輕，增程跑1400米亦夠贏。　

Sam