朝早有動靜：蘇保羅緊張皇帝旨令

魑魅魍魉

　　昨朝一眾胡廐馬如「旺家多寶」、「百贏萬歲」出操時，見到胡森全程吼實，其後練者更遲遲未離場，連其他馬房的馬匹也觀察一番，想收知己知彼之效。由此可見，今戰此路人馬必有搏殺意圖。

　　今晚賽事， 胡廐共派出五駒上陣，當中不乏實力分子，首要留意出爭第六場三班1650米的「旺家多寶」，昨朝在試閘期間，練者特地搵杜利萊傾談一番，相信話題應不離今晚賽事，睇動靜兩人有郁手意思。事實上，此駒上仗在同程走勢悅目，末段收復大量失地追入第二，僅以半個馬位不敵頭馬「靚到爆」，後勁絕不簡單。復課後，近日「旺家多寶」操磨甚力，勇態進一步攀升，尚未交代之馬，今戰必求打開勝門。

　　另一匹要留意的胡廐馬，是列陣尾場二班1800米的「百贏萬歲」，近兩仗先後出爭谷草一哩及田草1600米均落敗，但皆所負不遠，證明居現評分必具競爭力，昨朝此駒出踱時，見到胡森金睛火眼睇實，擺明對牠高度重視，今次吼準跑馬地銀瓶才報名上陣，隨時可以捧盃而回。

　　至於蘇保羅昨朝亦顯得相當緊張，當一眾戰馬如「追月」、「皇帝旨令」及「金碧亮馬」出操時，練者一直陪伴左右，擺明有計。其中出爭第四場四班 1650米的「皇帝旨令」，自轉馬房後狀態愈磨愈靚，練者近日亦對牠格外重視，每逢此駒出操時均如影隨形跟實，今次改由韋達出策，值得看重。

韋柏