洪禮賢講馬：聖河「何」來阻力

魑魅魍魉

　　來到本周日係季內最後一項一級賽上演日子，此為以前被稱為跑馬王嘅遮打盃。今屆只得7駒參加，其實選手多與少唔係好重要，反正來來去去都係得一兩駒有本事贏到，因為大長途好難博到懵，加上平磅跑，唔似得之前嘅皇太后盃，幾難出現輕磅馬偷到雞的情況。此外，呢次會係「爆冷」第五屆參與，可謂元老級選手，贏唔贏到唔知，但的確係有歷史任務，如果佢贏到呢屆，五年四奪錦標，呢個紀錄唔易有後繼者。　

　　除了歷史任務之外，對於「爆冷」而言，呢項盃賽好有作用，今季能否再次成為馬王，來到季尾拉唔拉到票，好睇佢到時跑成點，事關今季馬王之爭又係好似上季咁，冇邊匹馬特別標青，「蓮華生輝」之前攞3W，但已是2月嘅事﹔「綠色駿威」遠征成功，卻只是剛升格一級嘅國際短途錦標，同埋佢今季在港最叻係入Q之嘛。除非「友誼至上」等馬能贏安田紀念賽，如果唔係，而「爆冷」贏遮打盃，拉票的能力便大大提高。

爆冷拉票靠贏遮打盃

　　方廐小將何澤堯，一係唔贏，一贏至少起孖，兩次沙田日賽合共贏咗五場，今期有六匹坐騎，唔知仲有冇咁本事，但師父方嘉柏提供嘅「聖河」應該係叫胡馬。無他嘅，一落四班，唔好理之前喺三班跑成點，話晒2月嗰兩場四班賽冇甩過前四名，就連近乎盲門谷草都上到名（唯一一場），證明班次上係幾有優勢。今次賽前唞番夠皮，唔似得之前只係隔十幾日就跑一場，而冇耐之前仲贏埋課大閘，睇到成套準備，明顯係衝着今次而來﹔呢次對住一大批猶如條件賽的對手（14駒僅得三駒季內贏過），論級數佢點都秤先，5檔亦易掌握形勢，應是交代的黃金機會。