馮諾嘉手記：陽明飛飛本利歸還

魑魅魍魉

　　小妹近日運氣不俗，身邊頻頻傳嚟好消息，先係大表哥前幾日喜獲千金，BB女好可愛呢﹗跟住又輪到細表哥話好快要做爸爸，喜事浪接浪。之前喺本欄提過，小妹有個親戚入咗馬會受訓，雖然未必做得成騎師，但可能有機會做獸醫，雖未成事，但我已滿心歡喜，旺起上嚟，就連到澳門玩兩手都贏錢。上周三之戰更貼中三T，每場四隻，成本都只係六百幾蚊，派彩有成十五萬幾，假如真係買咗，就真係喜上加喜，小妹自己冇買到，唔知有冇fans買中呢﹖既然運勢咁好，希望嚟緊周日再接再厲。

頭場對手無多

　　周日沙田十一場賽事，蔡約翰派七駒參戰，當中包括頭場「陽明飛飛」同第三場「威德妙」，前駒角逐頭場新馬賽1200米，呢場有好幾匹馬狀態未到位，睇番「陽明飛飛」上場初出，小妹已經相當睇好，預期佢會一出即勝，賠率上亦見有唔少支持者，最後只得5.6倍，雖然最終畀廐侶「如願以償」後上所擒屈居亞軍，但已證明質素同狀態都唔錯，今場乘勇再戰，增程跑1200米，可以本利歸還。

　　「威德妙」同樣已跑咗一場，上場初出跑田草1400米，嗰場韋達揀騎呂廐「雄心威龍」，「威德妙」則由賴維銘操刀，雖然最終「威德妙」只跑梗頸四，而「雄心威龍」則以頸位僅敗屈居亞軍，證明韋達冇揀錯馬，不過，「威德妙」上場擺前走，終點前二百米仍然帶緊頭，走勢甚佳，熱身後今次縮程跑1200 米啱晒腳法，韋達即刻攞番嚟騎，係時候贏馬。