馮諾嘉手記：美猴王再贏冇難度

魑魅魍魉

　　剛啱沙田尾兩場賽事，因暴雨而被迫腰斬。當日朝早小妹響沙田飲早茶，當時已經烏雲密布，果然頭場開跑之後，即刻開始落起大雨，除咗跑道上到處都係水氹之外，就連馬場內外多個地方都水浸。

　　其實單計雨勢，根本早兩場就應該要取消賽事，相信馬會係唔想遮打盃延期，先等到第九場後至宣布取消賽事。不過天意弄人，宣布取消賽事之後居然即刻停雨；當然，為咗騎師安全，取消賽事亦無可厚非，況且場地爛成咁，馬迷亦未必願意落注。

　　根據天文台預測，聽日同樣會有狂風雷暴，賽事能否順利進行，真係要睇天。講番心水，第二場四班1000米，小妹揀咗九歲老馬「領航動力」做膽，今季雖然未贏過，但跑八次取得四亞兩季，證明狀態喼得好，嚟到季尾搏得就搏，有望取得久違嘅頭馬。配腳方面，先拖番近仗均跑近嘅「常山鳳寶」，而上場初出已跑近嘅「千兩寶寶」，當然要繼續留意。「永勝寶貝」洗底兩場之後，隨時施展回馬槍。四連環可拖埋連續兩場上名嘅「可圈可点」。

　　第七場一班1200米，唔使講一定用「美猴王」做膽，五戰同程居然全部贏晒，肯定係新一代谷草短途王，今場跑頂分為105分嘅一班賽，對手唔見得強，要再贏一場冇難度。「高點」連續五場跑第四，買四連環點可以少咗佢嗰份？「精彩生輝」上場跑1000米實在太短，但返嚟都輸唔遠，今次增程跑 1200米會啱啲，當然要留神。「活力飛駒」、「鼓浪天風」都係此程能手，宜一併吼實。