馮諾嘉手記：跑四班賽勝任有餘

魑魅魍魉

　　對上幾次港隊馬遠征，記憶中都冇一大班打氣團飛到當地打氣，但今次港隊馬遠征日本安田紀念賽，卻見馬會行政總裁應家柏同賽馬事務執行總監利達賢撐場，偏偏三匹港隊馬表現麻麻，最好嗰匹「勝眼光」亦只係跑第五，相信令到唔少山長水遠飛去東京打氣嘅馬迷失望。不過，東京咁多嘢買，相信一班團友都唔會空手而回。

　　講番今期心水，第三場四班1200米又見到「皆大歡喜」上陣，呢隻馬屬於小妹前老闆所有，之前都捧過幾次場，雖然至今仍未開齋，但近四仗全部入 Q，都幫小妹中過多次連贏！上場輸畀回勇嘅「百利旺」冇話可說，今場強手已去，怕且都係時候贏番場。

　　配腳方面，「勇蹄飛」上場跑泥地1200米有復甦迹象，今次即刻搵嚟柏寶操刀，求交代決心明顯，一定要吼實。「贏啲啲」近五仗獲三冠兩季，擺明當起當銳，冇理由唔揀。冷門方面，可留意抽到黃金一檔嘅「權勇駿」同減夠分嘅「京城孖寶」。

　　第五場四班一哩，小妹鍾意「勝任有餘」，前仗響同程打開勝門後，似乎真係開晒竅，上場居然響此程彈甩實力甚強嘅「蓋世子牙」連捷，今次再跑四班賽，唔會有任何阻力，仲要抽埋個黃金一檔，應該不勝無歸。配腳方面，「共同努力」新勝猶勇，雖然今次抽到大外檔起步，但白德民走位向來唔曳，要吼實。「中環英雄」後勁唔簡單，初跑谷草都唔可以睇小。「歐洲駿馬」贏完後韋達唔放手，應該仲有分在手，四連環拖埋剛啱入Q嘅「高耀之威」。