借題發揮：停賽復出=傾力反撲 吼韋達有福

魑魅魍魉

　　韋達停賽期滿復出，主觀意願覺得佢會傾力反撲，當然，有時世事唔係話想就得（我夠想中三T 啦！？），就好似柏寶咁，以為趁韋達停賽仲唔嗱嗱聲贏多幾場，我諗唔只得亨利一個會咁諗，結果係佢呢兩日嗰17匹坐騎，只贏到一匹「歡呼星」咁大把囉！期間唔係好多啫，有成12隻被捧成大熱或次熱門，追佢嘅馬，仲慘過追火車。

　　平心而論，韋達今期嘅馬唔算好標青，但點都比柏寶優勝多少，至少半數坐騎排到內檔。另外，睇番紀錄，原來韋達在港已經累積1198場頭馬，如果今晚起個孖，又會把個人成績推向更高峰。

　　講番佢啲馬，「天下寶」落番四班之後，演出明顯穩定番，唔似得在三班時，處於零價值狀態，希望今次再孭少啲磅，可令能力升級；「龍得風雲」捧W 唔制，始終係搏極未贏嘅馬，之不過，近仗係咁上名算本事，當然，另一方面要小心就係搏攰未呢？唔知一時間體能頂唔頂得住。

　　「福喜」三班着數就梗，而上場衝唔起或是內欄場地啜腳關係，因為睇番當晚谷草黏地，唔少頭馬都係外叠冚上嚟。呢次正常場地又有好檔幫手，不妨追多次。至於「旅英駿駒」，跑4場冇W有Q，準成咁，仲有咩好講，係睇吓12檔兼初跑谷草會影響幾大�s。 　

亨利