馬主論戰

魑魅魍魉

勁勇士繼續贏　　

　　剛啱「騰雲駕霧」、「卓爾非凡」同「共創未來」全部跑第二，大摩冇馬贏差少少運，不過今晚摩廐都有惡馬列陣，要贏馬補數唔難。先推介第七場「勁勇士」，近三次跑谷草1000米全部贏晒，擺明路有專長，今次再跑強項路程，應該可以保持不敗之身。

　　另外鍾意尾場「魔法幻影」，上一場響皇太后盃跑第四，只係輸畀「家家興旺」兩個馬位左右，表現其實唔曳。今次轉嚟谷草上陣，對手級數差一大截，即使負重磅都有權贏馬。

任達華

回鄉精神補中　　

　　今次賽事睇中咗兩匹三歲馬，先講第二場「回鄉精神」，上次響谷草1650米已經露過一手，只係以半個馬位輸畀有班底嘅「玩具神話」跑第二，表現相當唔錯，今次對手比上仗仲弱，睇嚟好有機會贏馬補中。

　　另外鍾意頭場「浪漫添馬」，上場轉苗禮德馬房初出，結果響谷草一哩彈甩「我跑得」近三個馬位贏馬，擺明響五班有着數。勝後只加8分，今次再跑五班賽都唔使負太重磅，點計都有着數，只要發揮正常，再贏一場冇難度。

張敬山

偉龍施回馬槍　　

　　徐雨石今晚手馬幾惡，我睇好佢有馬贏，最啱心水係第五場「偉龍」（圖），前仗響谷草1200米爆大冷贏馬，證明實力並唔簡單，上仗表現走樣，有可能受變化場地影響，唔能夠太作準。今次增程跑一哩，計血統必定啱發揮，話唔定又爆一場。

　　另一匹要留意嘅徐廐馬係第六場「金紫荊」，前仗已經響谷草1200米贏過「滙名燈」，實力唔使懷疑，上場排不利嘅十二檔起步亦放入第四，證明近態大勇，今次改排二檔好跑得多，要吼實。

梁廷鏘、寇鴻萍