洪禮賢 講馬：盈彩繽紛無敵手

魑魅魍魉

　　盈彩繽紛5場贏晒，冇乜好彈，尤其係前仗贏泥地一役，仲係佢5Ｗ之中贏得最遠一場﹔今次唞番夠本再出，睇心態大有衝擊6Ｗ的決心。

　　「天久」又係短期進步好大，連贏兩場愈來愈犀利，而按上場締速及姿態，加12分真係唔算重手，跳兩班亦冇有怕。

　　「威騰」今季只跑兩場，累積大量體力，在季尾點都好使好用，而上場準備不足一樣有追勢，賽績意想不到，希望狀態重新紮穩，或有更進一步演出。「得到寶」前仗碰上「盈彩繽紛」完全埋唔到身，唔期望有反先本領，但新勝馬憑銳勢盼可接近。「光輝出擊」之前加罩試閘唔錯，惟5月中曾放緩工夫，唔知影唔影響到。「奇異福星」神神怪怪，不過108磅及2檔會幫好多。「魄力王」贏完之後已經跌晒WATT。「聖法理」不明物體，只知唔係冇分在手。


第1場  第五班（40-0分）1400米 草地

　　誠信心及「卓越精英」一對馬於上場都有提供，來到今次基本因素仍近似，再追。

　　「辣得喜」唔係外檔，對其評級高好多。「愛拼者贏」近績算準，正路配腳。「風馳電掣」唔知點解近仗可以差得咁緊要，但評分大落後，不妨撈底。「安競」最近一課大閘的表現頗差，同埋馬重跌得太多，唔係唔擔心，就算有轉倉效應都係咁話。

第2場  第四班（60-40分）1000米 草地

　　錢照贏目前仍未收斂，純粹跑速度，集中跑直路賽最好。呢次同場再冇「小橋流水」，大有補中機會。「好快活」和「好笑容」長期會輸近，但要贏難度唔細，視乎形勢就唔就。

　　「好運精選」前仗贏完精神不振，唔知係咪禍延至上場，但計番今場基本條件，佢算四正。「精靈勇駿」入Ｐ或是場地慢使然，呢次轉路程未必可一可再。「高飛飛」未心灰，因剛賽出賽唔好打亂發揮﹔「綠茵勁贏」心律不正後的兩場賽事愈來愈跑得好，來到今場應到位。

第3場  第四班（60-40分）1200米 泥地

　　馬皇帝假如上場唔係喺對面直路尾被擯到大外叠蝕位，好有可能入Ｑ。今場對手仲水皮咗，贏得。「宇宙良駒」經常喼到咁上下水準，要贏則不易。「盈驥」、「家橋」等駒會放，似乎快馬易鬥乾。「勁力寶蹄」唔敢確定之前輸近的一場係咪偶一為之，但前仗同程沿途大外叠也輸得不遠，隔了１場有番幾十倍去博，值得試多一注。

　　「全德勝」近績嚇死，但落班後甚有分量。「萬人迷」成日追得吓，轉場或有生機。

第4場  第五班（40-0分）1600米 草地

　　極速寶寶用到柏寶仍見上場外閃嚴重，希望騎者實戰後有領悟，又希望加番配件幫到，那麼或可提升能力。「濰坊」與「太平洋」落到五班惡極，實力可翻一番。

　　「封面」連續兩場遇上塞車或阻礙，但演出卻愈見出色，現時既不用放頭也交到成績，戰鬥力的確升級。餘駒以「開心財星」和「足球大師」稍可取。

第5場  第四班（60-40分）1400米 草地

　　喜勝威唔知咩事賽後要隔一大輪之後才復操，係驚佢瘦就住，還是健康有問題，好難斷言，總之近兩仗演繹唔好也有不錯走勢，分數開始有利，呢次降班建議買一注，費事走寶。

　　「精英財星」前次初跑此程，係直路少數可大幅提升名次嘅馬，賽績具指標性。「按得醒」試完短途再試一哩，確認到長力去到邊後即轉1400米，部署有誠意。

　　「確叻星」演出反覆卻分利。「紅冠子」啱啱嗰場跑得好礙眼，但拉士又唔係冇得湧吓忽然換配件，大冷在此﹗「心路」如跑得番，至少有二三十分未兌現。「雙龍出海」如獨自慢放可能偷到雞。

第6場  第三班（80-60分）1800米 泥地

　　旺國手剛仗拉士爆嗰段幾誇張，如果喼到水準，今次加程仲啱發揮。

　　「怒火優勢」根本唔適合留住，希望跑番泥地，在跑法上會唔同，隨時變身。

　　「天寶之威」係未斷纜，不過換人、轉路程和升班，太多變數。「金獅猛將」說不定1800米比一哩更啱。「大紅人」腳冇事的話，三班其實係上風馬。「寶樹多盈」此程嫌長多少。

第7場  第三班（80-60分）1000米 草地

　　小橋流水初出即勝，姿態大超班，升班唔會有阻力，只係擔心此廐唔多連捷馬而已。「延續美麗」重戴眼罩跑直路賽，會比角逐谷草來得更啱。

　　「尚駿心」跑得好都係爭三至五名。「金鑽龍華」季中打後開始時有時冇，與季初表現大有分別。「砲嘜」臨場外觀係有轉變，又未於賽事中展現出來，但賠率夠冷，拖一注或有可觀回報。

第9場  第三班（80-60分）1400米 草地

　　談笑用兵跑番此程，點都比泥地短途合適，如加配件令陣上更投入，能力會升值。

　　「飛闖」只係輸畀「旅英駿駒」少少，二班都有得贏，目前在三班當然惡到出汁。「金堡龍華」具轉馬房蛻變的概念，始終之前也被外界一致公認係幾有前景嘅馬。「十則圍之」上場塞到死死吓，返嚟輸唔遠，而呢次跑短200米應有好冇壞。

第10場  第二班（100-80分）1600米 草地

　　魄力寶有級數，落番二班應鬆綁，就算此程不及1400米，諒可在三甲佔一席。「火龍駒」上場用嚟行頭，但估唔到贏到甩晒，贏開實要追。

　　「漂亮第一」前次還在一班賽輸少少，正路腳。「駿馬精英」打叠兩Ｗ，賽績要尊重。「鎗臣」太輕磅，排檔又好，或可食正形勢。