洪禮賢講馬：白費1199米的努力

魑魅魍魉

　　來到季尾階段，唔多唔少都會有疲倦之感，始終今季已跑了75期賽事，一共687場，任你如何投入、熱愛賽事，「容器」也會近飽和，好在今季賽期編得好，終於冇打叠賽期，加上收咧日子延伸了，才不致出現吃不消，或睇見都驚之感。

　　但近幾期賽事，真係出現唔少睇見都驚的鏡頭，而往往都係在賽事末段發生，例如「好妙星」的梁家偉，「浪漫添馬」嘅潘頓，以及剛賽德叔的「萬人迷」﹗當然他們最後也可全身而退，賽後報告中有晒開脫的證供，但是否成立，或令人信服則作別論，不過唔係阿賢想講的主旨，因為，最想講都係騎唔騎的問題。

　　早排阿賢有段稿已指出小何「威威財星」的事件，至今仍認為當時如果騎埋嗰三兩步，有Ｐ的可能性極大。再到上述3駒的案例，情況大同小異，「好妙星」係咪冇機會入Q﹖「浪漫添馬」唔用反手鞭會唔會贏得﹖「萬人迷」唔收鞭有冇Ｐ﹖呢3個問題，讀者們自有答案，不用我去引導了，至於，當時礙眼與否，有冇激死街坊，算吧啦，已是過去式了。

　　但如果一再出現類似事件，其實真係好唔健康，站在騎師形象，或投注者角度，甚至賽馬事業，絕對有不良影響，現實啲咁講，都唔好計獨贏或特別彩池，只係以位置彩池作據，閒閒哋１隻馬在單一場次孭起一兩球飛，你唔騎埋最後嗰一兩步，一兩球就隨之倒落海，投注額之巨，牽連之大，點會係單單在賽後講幾句就攪掂。當然，我唔會質疑騎師在陣上的努力，但路程明明係1200米，全神貫注跑了1199米又如何，若然尚有1米未到終點，無情情鬆懈了，之前再努力也白費﹖﹗