韋達柏寶4：4大開和其他

魑魅魍魉

世界盃剛開波，首輪分組賽「細」風疾吹，球迷人人嗌悶。要睇「大」戰，沙田馬場率先上演，鬥到荼蘼的冠軍騎師之爭，榜首雙雄昨午贏馬梅花間竹，韋達頭場「如願以償」先開紀錄，柏寶以「暖在心頭」及「火耀雷霆」回敬，雖一度被前者「威德妙」追和，隨即再贏「確威星」領先上半場。下半場韋達重整旗鼓，「川河勁駒」、「國寶」連入兩粒，一度反先四比三，臨完場卻被柏寶「福勝滿載」終點前壓線成功，補時最後一刻扳平，開出四比四「和其他」賽果，馬迷睇兩大師傅輪流士哥，無不如癡如醉。
       
福勝滿載
封王又豐收 柏寶攞晒彩

柏寶目前仍在騎師榜上領先，不過自從韋達停賽復出，已被宿敵追得透不過氣，可幸他知恥近乎勇，昨午先後憑「暖在心頭」、「火耀雷霆」、「確威星」及「福勝滿載」四喜臨門，與韋達平分秋色之餘，更以六十分力壓對方榮膺騎師王；四駒獨贏過關接近四千倍，比韋達四匹全熱門頭馬更勝一籌，贏完面子兼大豐收，今勻攞晒彩矣。
       
暖在心頭

在柏寶胯下爆出十倍半冷的「火耀雷霆」，馬主關百豪剛成功中籤，如今又拉頭馬，雙喜臨門。
       
火燿雷霆
福勝滿載韋達蝕晒章

至於「福勝滿載」，方嘉柏表示此駒小休逾兩月，部署季尾再戰，原打算交韋達出爭較早前的一千米，最終改變計劃報跑昨午千二，由於同場有蔡廐「戰河」可揀，因而改交柏寶執韁，後者冷手執個熱煎堆，一來一回令今季冠軍騎師之爭增添變數！