吳定強連勝6日破紀錄

魑魅魍魉

吳定強馬房最近頭馬陸續有來，尋日喺主場快活谷繼續嚟料，第二場四班谷草一千米，強哥靠九歲老馬「領航動力」增添進帳，馬房仲連續六個賽日有馬贏，打破本身最長連勝紀錄，夠晒動力！
       
領航動力台前幕後笑開懷。

其實呢隻「領航動力」近排嘅演出好準，之前嗰三鋪跑谷草一千都上名，到尋日終於贏番次，馬主胡偉林梗係非常開心啦！不過，馬主胡就話愛駒都已經一把年紀，今季又搏得咁盡，加埋自己手上又有兩支籤，隨時可以引入新血補充，佢諗住畀「領航動力」光榮退役，留番個好印象畀馬迷同自己。