馮諾嘉手記：一日六W創紀錄 柏寶表現大進

魑魅魍魉

　　剛戰應該係方嘉柏同柏寶季內最難忘嘅一日，兩人各自響一日之內取得六場頭馬。小妹睇馬到依家，只記得蔡約翰試過一日之內贏五場，所以當日去到第八場「大進」贏馬捧盃之後，小妹已經向一啲老前輩請教，香港賽馬史上到底有冇人試過一日內贏六場﹖當時都冇人可以畀出肯定嘅答案。結果，第九場佢哋再憑「發達心聲」贏第六場頭馬，方嘉柏同柏寶開心到互咀，前者更響沙圈度跳晒舞，睇到都戥佢哋高興。

　　翻查紀錄，練馬師一日內贏六場，張學文響1975年試過，當時小妹仲未出世，呢個紀錄亦足足保持咗35年，結果由方嘉柏平咗呢項紀錄。不過比起當年，方嘉柏贏六場嘅難度其實高好多，皆因依家不但馬房較多，而且各練馬師嘅成績同表現都好平均，要獨霸一方談何容易﹖加上賽馬勝負實在涉及太多因素，包括馬匹狀態、場地、檔位及對手實力等，要一日六捷根本極難。

　　馬房要響一個賽日之內多捷，部署方面考功夫之餘，仲要手頭上子彈充足兼有埋形勢配合，先至可以連場數胡。相比起嚟，騎師要連場贏馬可能會比較容易，好似韋達同柏寶兩大師傅咁，佢哋經常都手執多匹好馬，自然大大增加佢哋嘅勝算，所以過去已經試過有多位騎師一日內取得五捷，包括韋達、馬佳善、蘇銘倫同李格力等。

做埋冠軍騎師更威水

　　不過，柏寶今次憑「當旺」、「開心動力」、「再來風」、「電訊高星」、「大進」同「發達心聲」一日六捷，已經創下騎師一日之內贏馬最多嘅紀錄，呢項成就連九屆冠軍騎師韋達都望塵莫及，柏寶今季表現確實大進。

　　當然，破紀錄事小，小妹相信依家柏寶最希望嘅係繼續保持領先優勢，正式做番次騎師一哥。