洪禮賢講馬：期望盈彩繽紛7Ｗ

魑魅魍魉

　　有咩生意或投資會賺梗﹖應該唔會有囉，風險處處嘛，像搞任何生意，如天時、地利及人和，是但冇咁一瓣，唔易做得長。

　　又例如股票投資，就算有套戥，或是甚麼平均成本法，如遇到Ｖ型市、大跌市等等，一樣企晒喺度。之但係，睇睇今個禮拜日，的確有一門生意幾乎係賺梗，咦，望一望新馬短途錦標，出馬4大隻，即係話隻隻跑完都有獎金，其實如果是但邊個馬房報多1隻都好，就算包尾兩駒一樣有錢收，邊有咁筍嘅優惠，當然，最緊要唔好跑傷，咁就只用花上分幾鐘，即可穩袋一班獎金﹗

賽績勁嚇退對手

　　或許該組有兩駒太惡了，所以就算穩袋獎金，亦冇咩練馬師有興趣派馬報名，剩係1隻「美猴王」已經嚇走晒啲客仔（上場騎到畀人「卜」喎﹗換人實搏晒命），始終之前響谷草嘅表現係有眼睇，唔係上場塞死咗，可能已取得季內第6W，今次轉嚟沙田跑，級數唔覺得會輸蝕。同組再整多隻無敵馬「盈彩繽紛」，6 場未輸過，原本想參與嘅，既然預咗會撞到佢哋，實會打退堂鼓。

　　坦白講，過去「盈彩繽紛」6Ｗ都唔關我事，1個仙都冇買過，唔會有咩感情，最多都係大版貼士有佢個名，但呢次真係好希望佢贏得到，話晒7捷締造歷史嘛，真係百年難得一見，強如當日「精英大師」都係一季6捷而已，所以真係希望見到創造傳奇嘅一刻。

　　事實上，今季先後有唔少歷史性一刻出現，如韋達憑「極品絲綢」贏到打吡、柏寶單日破紀錄取得6Ｗ、「好爸爸」一哩錦標三連霸等等，場面都令人好難忘，若然「盈彩繽紛」破埋宿命，的確係傳奇的一季，所以值得同佢打打氣。