馮諾嘉手記：國中之星強配交代

魑魅魍魉

　　剛啱韋達憑「陽明飛飛」、「長春樹」、「披星戴月」同「國寶」贏四W，柏寶就繼續交白卷，經過多日努力之下，前者終於重返騎師榜榜首。

　　韋達有蔡約翰力撐，固然係攞到好成績嘅主因，但近期騎者的確多咗其他倉口支持，好似早排就有久未合作嘅告東尼醒咗匹「同歡笑」畀佢贏，而剛戰文家良、葉楚航同呂健威等人亦都紛紛支持。

　　反而柏寶嘅受歡迎程度似乎有下降趨勢，好似聽晚谷戰咁，韋達騎足八場，但柏寶居然只得七匹坐騎。去到爭冠軍嘅關鍵時刻，柏寶居然有場次要坐冷板，似乎真係有啲大勢已去嘅感覺。

　　第三場四班1200米，小妹揀咗「如願以償」做膽，早排響新馬賽兩戰兩勝，姿態相當輕鬆，轉咗谷草照計都啱跑，放心捧場。配腳先揀「大把在手」，上場初跑谷草即勝，窄場性能肯定出色。「帶利財子」又排一檔，估計會繼續賺形勢。「高飛飛」雖然仲未開齋，但近兩場都跑近，要繼續吼實，另外拖埋此程向來好準嘅「質超駒」。

　　第七場二班1800米，小妹鍾意季內尚未交代嘅「國中之星」，上仗響同程輸畀「魔法幻影」唔夠一個馬位，狀態已經返咗嚟，告東尼用到韋達，肯定唔係講玩，有望贏馬。配腳要拖「雄風」，現階段增程應該更啱腳法。「好兄弟」直路例衝一段，要拖。「零距離」上場跑社群盃遇強手都跑近，唔好太睇小。四連環可以兼顧埋「錢程萬里」，雖然近仗表現較為飄忽，但冷敲無妨。