駱穎豪手記：一路奇兵三連捷

魑魅魍魉

　　以往煞料日多數安排沙田日賽，希望吸引更多人入場，今季則在下周三谷草煞科，而明日田草最後一戰，唔睇有甚麼紀念品，單睇紅星嘅陣容已經夠晒吸引力，分別有容祖兒、王祖藍、蔡卓妍及林峯，估計屆時一定吸引到唔少粉絲入場。

　　當日更會頒發冠軍人馬獎，相信唔少馬主、練馬師都十分期待呢刻來臨，但今屆冠軍練馬師、騎師及見習騎師三大獎項則會於谷草煞科日頒發，相信當晚氣氛一定不如沙田煞科般熱鬧。

　　第一場四班1200米，用「一路奇兵」做膽，韋達今日又成手惡馬，呢匹就係其中一匹叫胡馬，牠谷草跑過多仗後，一轉戰沙田隨即一放到底打開勝門，上場跑黏軟地，改從中後位置後上發力，更大勝個幾馬位，明顯開竅後愈跑愈醒，大可三連捷。

　　配腳拖初出即大勝個幾馬位嘅「肥仔糖」，以及前仗初出獲亞嘅「普渡馗」，上場突然失準大熱倒灶，賽後解釋黏軟地不合，今場柏寶繼續操刀，應會交出好表現。拖多匹上場跑近獲季嘅「甜蜜至上」，四連環則揀上場跑近得一席梗頸四嘅「揀得準」。

　　第六場四班1600米，用新勝馬「按得醒」做膽，呢匹三歲馬上仗後上甚勁掄元，潛質豐厚。配腳拖近兩仗均獲入季軍，實好鬥志嘅「歡樂寶寶」。「漸信良駒」出道四仗三度入位，只是欠運未出頭，今場搵來韋達幫手必拼。「吉利多」上場大熱搏失獲季軍，今場力求補中要兼顧。四連環揀多匹「陸豐福星」，季內已經多仗跑近，時刻要兼顧。