搏殺格：田戰煞科有乜玩 巨額3Ｔ柏寶送涼風

魑魅魍魉

　　今日沙田煞科戰，入場照例有贈品攞，但真正馬迷幾時都係搵唞暑費第一，如果你都係，不妨博吓巨額 3Ｔ，因為馬會加入儲備之後，多寶已推高到一千七百萬元，十蚊一注獨中嘅話，估計分分鐘收三千萬元。統計顯示，今季3Ｔ以柏寶戰績最標青，練馬師文家良亦唔曳，佢哋合作嘅「再來風」列陣3Ｔ尾關，呢匹曾有嚴重腳患之馬，難得勝後狀態一樣咁弗，跑1400米實好分，唔搏就假，炎炎夏日，呢陣涼「風」，隨時可以救命。