馮諾嘉手記：國寶 三連捷在望

魑魅魍魉

　　剛戰蔡約翰屯重兵上陣，諗住佢同韋達又會連場數胡，點知蔡神仙法術居然失靈，多匹實力馬跑到連影都冇，好似「安鞍」同「川河勁駒」兩匹十幾蚊大熱，只係分別跑第五同第七，連披士都撻埋。

　　至於賽前一直係騎師王大熱嘅韋達，頭場贏咗「一路奇兵」之後，諗住頭馬會陸續有嚟，點知贏馬機器突然死火，只係憑「勁高手」同「漸信良駒」多添兩Ｐ，最終由馬偉昌封王，都算係令人意外嘅賽果。

　　講番聽晚煞科谷草夜賽，第六場三班1200米，小妹揀咗「大進」做膽，近三仗跑同程嬴咗兩場，輸嗰場係抽外檔起步，敗績唔能夠作準。今次呢隻馬繼續由柏寶操刀，騎者為爭冠軍一定會搏盡，抽埋一檔起步坐位望贏。配腳先揀「駿蹄飛」，上場加眼罩後即刻贏馬，睇姿態仲有分響手，要吼實。「祥勝愛駒」、「心中有勁」近期都有好走勢，正路配腳。四連環揀埋「質超駒」，上場唞咗三個月復出都跑近，熱身後表現隨時可以再進一步。

　　第七場三班一哩，小妺鍾意「國寶」，季內七仗全部非勝即位，近兩場跑田草1400米更全部贏晒，證明近況大勇，今場轉嚟谷草上陣，季初已經響此場地上過名，反映窄場性能冇問題，三連捷冇難度。

　　配腳先揀「智友」，轉方廐後九戰得四勝兩位，演出夠晒準，必拖。「納帕二號」韋達攞嚟跑，唔似係陪跑格局，唔能夠睇小。「歡歡樂樂」上場已露走勢，轉場可以突擊。「包裝老友」勝在跑法主動，唔排除可放入一席。