高清睇跑馬：皆大歡喜穩補中

魑魅魍魉

　　今季總場次599谷草三班1200米﹕「皆大歡喜」十檔起步後被拖實，推騎下仍居最尾位置，轉彎早段勞愛德再次催策，總算跟番較前並於內檔慳位競跑﹔該戰跑A欄彎位冇咁急，群駒不會掟出外檔，難免重重被困，勞愛德算是機智，入直路已由內檔逐步移出外檔，可惜過了二百米處才望空，縱使衝刺強勁，也只能追入Q腳﹔今次回配潘頓重遊舊路，檔位內移可期補中。

　　總場次657谷草一班1200米﹕「美猴王」出閘唔算快，不久柏寶輕騎以免落後太多，即由尾四進佔至六、七位，柏寶本來用意向好，卻因一直在內檔競跑，前面有「高點」，外邊又有「龍武軍」，就此被困於極被動的位置，且一入直路便遇到嚴重意外，本來想由「高點」內側貼欄殺上，可惜在前領放的「鼓浪天風」向內斜跑，先阻及「高點」，導致「高點」壓向「美猴王」，「美猴王」因而大力勒避﹔今晚重配騎慣騎熟的韋達，收復前失冇問題。

Sam