洪禮賢講馬：小心解讀糖衣賽績

魑魅魍魉

　　老掉牙的理論.....「半杯水」吧，究竟係本身斟得半杯？定係飲了剩番一半。無需多角度去思考，用兩面睇便夠了。正當每件事簡單到得兩面， 唔會複雜到爆出一百幾十個版本， 卻仍有Ａ、Ｂ給我們選擇，對與錯喺邊便似乎好易？但揀錯，又有乜咁奇！？

　　如果Ａ、Ｂ之間二揀一真係咁易， 引伸至世盃球賽，得兩隊之嘛，獨贏唔係西班牙就係荷蘭，有幾難噃？照道理，贏錢應該大有人在。可惜，長做長有嘅，永遠係莊家。賭仔們，邊有咁筍，就算只係揀Ａ、Ｂ，依然長期揀錯居多。

　　講到另一兩面的睇法.....馬匹輸近賽績。究竟跑得接近會是下仗補中或進步中嘅啟示，還是糖衣包裝嘅毒藥？如果解讀賽績唔好，一線之差咋，明明係毒藥，誤以為糖果，最終又係我們蒙受金錢上損失。

衝得勁≠嚟緊

　　解讀馬匹輸近賽績之時，按締速、沿途取位、當時狀況等因素去評估，係最基本要求。若果單憑：「嘩，你睇隻馬上次衝上嚟個勢幾勁！」呢一句說話，就斷定該駒輸近係嚟緊嘅反映，大大話話1期賽事，會有三五七駒有類似鏡頭，全部都喺下仗跟進，回報肯定唔成正比；記得上季尾六月二日， 有一場四班谷草1650米，結果由「燈胆寶」取勝，該場頭馬與包尾嗰匹馬相差僅五乖，跑第十嘅「當旺」只輸兩乖許。嘩，一大堆賽駒緊貼着過終點，齊齊輸近， 下仗f o l l o w 得邊隻，而最後又有幾多駒可更進一步呢！？