洪禮賢講馬:畀京城孖寶「掌摑」

博彩老头

　　早排寫過段稿關於邊緣評分嘅馬，大概係想表達好些馬（馬房部署）唔係咁容易估， 以為只欠1 分就落班，唔會貿貿然郁手啩？點知話口未完， 已經爆咗出嚟，但唔可以話完全係主觀意願令判斷出錯，只因邏輯上冇問題。

　　取易不取難，乃人之常情，知道問題何在，不想浪費資源行冤枉路嘛。

　　然而，賽馬世界唔會係一加一等於二！冇錯，偶爾某些練者的部署手法，真係畫公仔畫出腸，有時仲係賣大包嗰隻，賠率好分到大家都唔信，一樣照贏可也，就如「實在好」，多季以來都係五班O K， 四班NO WAY！又例如已他投的「活威小子」，轉吳定強馬房後，未知新季會否有突破，之但係，在上手馬房咁多年，跑親入三甲全數喺五班，在四班叻極第五名咋！究竟係隻馬識睇班次和對手？練者妙絕部署？抑或真係唔夠班？有可能3點都係。既然往績係咁，因循又有咩錯。

差1分落五班竟入Q

　　而反面教材唔係話冇，像上季「京城孖寶」，已摑了我一巴。滿以為跑了接近一季（四班賽），由去年9月16日跑到今年7月，用了接近10個月嘅時間，已經由59分落到41分，如果4/7那役輸埋（ 弱項泥地喎！），減多1分可落班趕及煞科五班谷草1200米，點知就喺嗰場泥地1200米僅負於「風陵渡」入Q。正所謂等咗佢成季， 呢場走咗雞，唔多唔少怪責自己。賽後除了檢討，惟有阿Q精神，視失敗為生命中不可或缺的過程吧。