洪禮賢YIN’S TALK講馬：切忌貪勝不知輸

博彩老头

　　講開cut lost，筆者曾經貪勝不知輸，有過一段慘痛嘅教訓。話說好多好多年前，買過一隻藍籌股（冧吧就無謂講，但睇埋落去就知邊隻），當時以為該公司歷史猶久，做緊嗰行佢又係巨擘，派息亦唔錯，咪將一大筆資金「瞓」落去。結果該公司的股價如江河日下，但那時仍未懂止蝕（其實曾經上水8~10%），以為只是短期波幅，心諗都係鬥長命之嘛，實有機會望見家鄉！但最尾就算股份5合1，股價仍缺乏上升動力。望一望依家....原來得兩個幾！真係低處未算低。

　　而多年前又試過同一遭遇，諗住該公司好多概念噃，一定炒得上（公司名又係無謂講嘞！），但最終股價下跌的劇情，同前述公司差唔多，小弟賠上的金額，算一算，唉....買隻「金鋼勞」都仲有得找。

要懂得止賺

　　由呢兩個教訓開始，深明止蝕，和不要與股票談戀愛的道理，這思路亦伸延至賽馬。所以，自此不會盲目跟進任何賽駒，一次起、兩次止、三次冇法子，自己投注如是，做節目之時，亦唔會鼓吹呢種行為。

　　其實止蝕之外，亦要懂得止賺，呢點亦都重要，從來唔信會有贏唔完嘅錢（運），正所謂長路有盡時，贏得就固然可以輸得！

　　因此，每當在馬場上水之時，夾叠再搏的心態，唔係咁認同，如果任何博彩活動，咁易畀你夾叠搞掂，唔少都會以賭為生喇，仲邊度會有人做打工仔，返朝9晚7，真係睬你都傻！？

洪禮賢　馬會賽馬節目主持