賠率有路捉：心歡笑信心大

港陌

　　第五場「心歡笑」賠率好古怪，呢隻馬迷心目中嘅泥地馬，過往喺田草及谷草加埋八戰，一席位置都冇，今晚跑草地居然被捧成59蚊大熱門， 真係唔知何方神聖咁有把握。睇番呢隻馬排位朝試草地，一貫大摩搏馬手法，加上喺英國贏過草地賽，配合埋呢注飛信得過，各位咪以為一定要等泥地賽呀。

　　另外，第七場四班一哩，出賽馬實力好平均，係全晚最混亂場合，仲難揀馬過三T 場合，不過噚日早飛大熱並唔係「創新高」同「超力駒」兩匹重磅馬，亦唔係韋達嘅「緣是燦爛」，居然落係難出頭嘅「再來旺財」身上，WP都係大熱，53 蚊W，15蚊P，明顯有強大支持。睇番賽績，此駒上季贏馬一役正正係季初第一場，喺谷草同班同程一放而回，證明唞夠威力唔簡單，當時負118 磅，而今晚仲要少負兩磅，形勢非常有利，今鋪有飛一定有景轟，睇得出有人信心唔細。

騎師王捧楊明綸

　　騎師王方面，韋達騎足八場，但坐騎實力唔係一面倒惡晒，熱門制唔過，相反楊明綸雖然只得四駒，但「興緻高」、「特好」擅跑新鮮；「質超駒」及「天下寶」則班分有利，有十幾倍點解唔博吓呢。

周仲