洪禮賢講馬：野馬暑期進步大

猪拉多纳

　　泊咗個好碼頭，對爭取成績零舍有幫助，唔使睇咁多個，單單一個柏寶已經係最佳證明，跑咗兩期賽事，一共14匹馬，交出4W3Q（4匹大熱獲3W，全屬方廐），入Ｑ率50%，真係準到冇朋! 如果比較起佢上季同期成績，今季勢頭更加犀利，會唔會又衰收尾唔知，但此際順開有條路，唔吼實佢，唔通信韋冠軍咩！

　　當然從來唔會麻痺自己思路，盲目去捧任何一個騎師，柏寶雖好，都要有馬扶持，初步覺得佢禮拜日最好係頭尾場「野馬」和「快樂小子」，後駒留番聽日至講，今日先講前駒。

　　「野馬」馬名冇改錯，佢嘅性情真係一匹野馬，出道之初，新嫩馬身上出現嘅毛病，佢都「包辦」晒，係咁意講一部分，如慢閘、扭計、側頭、大汗、出腳生硬、情緒波動等等，所以，早期成績點會好。但見上季尾轉到賀廐，脾氣明顯好咗，雖然轉倉首仗臨場仍見情緒未穩，純粹以佢自己嚟講，舉止已乖咗唔少，結果出嚟嘅成績亦係最好一場；唞暑後復課的確有進步，試跑時快得嚟唔急躁，而最鍾意係快試後回程，情緒依然安穩，估計今季的能力會有若干升級，呢次再跑直路賽，有權帶到。