楝悉先機：方廐主場有意思

魑魅魍魉

　　度馬嘅時候真係要顧及天氣情況，一個唔好彩，度好晒一大批好地馬，點知跑馬途中整場攔門雨，到時真真正正見財化水！睇過今日天氣報告，又狂風又雷暴，兼且多雲有雨，睇嚟今晚谷賽大家唔使旨意會跑好快地，度定一部分識打水戰嘅馬穩陣啲，唔使入到場至臨急抱佛腳。

　　第一場第四班1200米。「千兩寶寶」有過好黏地上名紀錄，除非出現重變化場地，如果唔係，今晚就算跑變化地，此馬一樣應付到。此駒上季跑來跑去依然未贏，主因係未識留力，以致常常於比賽早段用力多咗。希望經過一個暑期，心智能夠成熟，並學會收斂，如果唔係阿棟諗得過分理想化，以佢咁有彈性嘅跑法，要贏番場唔難。

家橋形勢一流

　　第二場第四班1200米。「家橋」上場已經貼做正選，贏起上嚟姿態好清脆，雖然只係彈開唔啱路程嘅「莫己若」，按贏馬締速唔係冇水準。今場轉到 1200米，其實更啱發揮，預期有「中華英雄」及「好玩」放領，好大機會出現早段步速快，對於喜歡守好位嘅「家橋」嚟講，形勢夾到暈，再贏唔奇。

　　第四場第四班1650米。「新意思」材料有限，在此班唔係好高，勝在啱啱熱完身，狀態快入局，跑得好嘅機會，點都比大部分對手為高。而上場輸在全程外叠，蝕得多先至直路衝得唔勁，呢次返番方嘉柏主場谷草，短直路好，排4檔又易做啱留放，上次臨場有跟風嘅馬友，或可喺今場本利歸還。

點買法

　　揀咗3匹做重心，買位置過關完全「冇力」，點都要向獨贏打主意，但「千兩寶寶」和「家橋」隔夜W賠率俱為3倍或以下，乘埋亦冇咩肉食，玩吓手，中得兩件可能只係打個和，與其係咁， 倒不如博博連贏位， 第一、二及四場，整條Q3x4，每關一拖三， 本錢$540。