軍刀劈開悶局

魑魅魍魉

今季跑過五個回合，未開齋騎師只剩三人，畢業以來發展平平的王志偉，上季只取得七場勝仗，早已屈埋一肚悶氣；今季頹勢未止，暫時只得三場亞軍，始終與頭馬緣慳一面，這位餓Ｗ已久的本地薑，現階段只要有餐士坐騎在手，必定打醒十二分精神，施展渾身解數爭取勝利。
       

等到今午機會來了，今季初出僅不敵超班馬「小橋流水」跑第二的「軍刀」，至今八戰仍未打開勝利之門，求勝心意絕不在王志偉之下。這路急於開齋人馬雙劍合璧，殺氣已到達頂點，誓要在今場愛爾蘭錦標大開殺戒，將悶局狠狠劈開！
       
軍刀上仗雖不敵超班馬小橋流水，卻已跑贏同場其他對手。
轉場抽一檔‧如虎添翼

王志偉：「軍刀」剛戰季內初出跑嫌短的一千米直路賽，面對超班馬「小橋流水」，最終雖不敵後駒三乘許，但表現已不差。今次轉場增程角逐谷草千二米，肯定較合腳法，況且抽獲黃金一檔，可謂如虎添翼。狀態方面，此駒經過一仗熱身後，已明顯轉勇，今次既有好形勢配合，希望順利打開勝利之門。
       
鄭雨滇
大把在手試閘有前有後

鄭雨滇：「大把在手」上季尾轉戰谷草千二米，獲一冠一季全上名，肯定路有專長，但今次重返三班作賽，兼失去上季五磅分齡讓磅，形勢已大不如前。不過，此駒今季進度尚算令人滿意，早前試千二米泥閘交出銳利前速，拉士亦貫注到底，已具作戰水準，面對此群有力一爭。
       
葉楚航
連利福星一早卜定柏寶

葉楚航：雖然「連利福星」月初曾交由馬偉昌試谷閘，實際上我早已卜定兩捷配搭柏寶夥拍此駒攻堅，以收人馬合拍之效。即使近日天氣不穩，但O'Reilly子嗣普遍可以應付淋地，因此我不怕此駒受場地變化影響表現，難得今次抽三檔好位，賽前已試兩課大閘做足工夫，可見真章。
       
方嘉柏
大進減十磅有着數

方嘉柏：「大進」跑谷草千二米演出一向穩定，上季最後一仗因早段步速太快，才被後上的「浚鋒天河」追過屈居亞軍，未能連捷有點可惜，表現卻絕不失禮。今季開操後，「大進」的狀態依然令人滿意，埋門與「衝鋒槍」拍跳走勢亦佳，今次改用徒弟何澤堯減十磅出擊，機會樂觀。