洪禮賢講馬：偉龍一放到底

魑魅魍魉

　　韋達及柏寶今日好多坐騎，究竟係咪佢兩個嘅天下，又未必噃！？如果賠率唔值博，話之你係邊個，一樣當睇唔到。反而，一眾二三線騎師有唔錯上陣馬，賽果有少少扭曲，派彩就可觀嘞！

重心場次　

第3場　第四班（60-40分）1800米

　　「勁擊」屬此廐早開操馬之一，8月已試好晒閘，根據苗廐季初見好那批馬的模式，佢都會係搶灘的成員；今場似乎冇步速，或對佢嘅後上跑法失利，記得上季曾以中置跑法入圍，目前戰術運用已不是單一化，加上此對騎練今季合作成功率幾高，可以睇重。

　　「好旺財」上季搏嚟搏去贏唔到，材料有限，今場可取係步速由佢話事，拿捏得好或有轉機。「天下寶」開氣後有一哩唔跑，係要加程，賽績冇乜根據，但上季早有經驗（直路勒避亦輸不足5乘），練者肯再試，唔似陪襯。

　　「衝勁直前」降班着數，但老馬未開氣，總係有戒心，兼且，暑後總覺其態況未夠，限拖腳。「經典再現」對上兩季初出贏晒，而去季尾行時重見朝氣，再經過暑期調節，或可養回，論能力又係四班大超。「超勇駿」去到埋門草地試跑稍轉好（之前那課半程已腳軟）。「創新高」上場跑得太差，開氣後即變身也揀唔到了；「心頭好」亦有同感。

第1場　第五班（40-15分）1000米

　　「星光妙韻」如果唔係太耐冇出，其實係全日重心之一。事實上，去季中流完鼻血之後，1月已全面復課，而來到今季，試跑或大閘已不見昔日亂籠跑姿，以及過分任性，今場有1檔之利，就算搶頭走，一樣信佢夠氣帶到。

　　「野馬」上場半途甩口，輸亦冇得好講，既然上賽前見好，冇理由唔畀多次機會，話晒今場有除罩及轉場的變數。「搏得過」和「你好我好」上場分獲三四名，論走勢則以被阻的後駒較吸引，加上，今場排檔問題，前駒不易應付。「馬中神駒」唔夠態，但有班；「時時有機」情況一樣。

第2場　第四班（60-40分）1000米

　　「清新空氣」上季賽後練者曾指出唔襟搏的問題，姑勿論今季會否成熟，但隔了一個暑期實儲夠體力，加上，大閘及拍跳一畀即飈嘅悅目追勢，冇理由唔搵佢行頭。「領航動力」上場一課冇跳過，結果有殿軍算叻，熱完身肯定有助，向來不怕外檔，10檔難唔倒佢。

　　「文武維揚」試跑硬身多少，力度感則不錯。「當旺」回到此程比較有把握。「超晒班」得個快字，唯一可博係開完氣轉埋場，靠一啖氣放返。「皇仁神駒」9月分操得已難能可貴，論級數四班超到暈。

第4場　第五班（40-15分）1650米

　　「心路」初出唔係喺直路彎碰撞令自己失平衡，引致拉士好遲撻着，唔贏都應該有Ｐ，總之今場正路地加程，仲用到柏寶，好恨贏。「龍子」跑了一場，復課係「行」咗啲。

　　「喜相逢」剛仗跑法太蝕章，名次落後的主因，當開氣程序算吧啦，忽然換配備，如肯執正跑法，隨時唔同晒。「快馬當先」沒有上季長期的性急毛病，轉馬房後係唔同咗，有得博冷。「賞心樂事」完全唔識跑淋地，剛敗唔使理，而上季未熟可在谷草輸近，早有伏線，突然大幅加程，小心爆大冷。「冰火」及「銀鷹」能否頂到兩場，真係話唔埋！？

第5場　第四班（60-40分）1650米

　　「偉龍」剛仗前中段放急咗（比同日二三班還要快），仍保住一席季軍，其實好難得，轉回到此程仲好跑，而9檔對佢冇影響，只要唔係沿路大外叠，有本事返到。「回鄉精神」及「奔騰飛駒」好開，正路配腳。

　　「好運得福」長途馬縱有新鮮感，都驚一哩追唔切。「電子精英」埋門進度漸有起色，但重磅向來有影響。「再來旺財」單獨領放的如意算盤，在今場未必打得響。

第6場　第四班（60-40分）1200米

　　「百利旺」上場贏過晒同場嘅「亞洲橙王」、「開心好多」等駒，只要體力頂得住，贏面大。後兩駒的跑法迥異，形勢計落可能係「亞洲橙王」啱夾，因同場多馬會走。

　　「心歡笑」剛賽好位下直路冇得衝，的確失望，最多畀埋今次機會。「奇蹟」工序唔似樣。「最上」唔漏閘，上場或可處理得更好，當有跟進必要。「瀟灑財星」快時間之下入Ｑ（頭馬造出今季最快1200米時間），那席亞軍具代表性。「辣得喜」經上場失望而回，暫時冇期望了。「贏馬組合」唔係9檔，大有贏面。

第7場　第三班（80-60分）1800米

　　「鵬力洋洋」今季暑後size變大了，既可一出即勝，證明壯碩後令能力升級，轉程1800米更好衝，再Ｗ。「星際雄師」剛賽直路彎阻得緊要（因勒避損失1個身位），所以臨尾追勢普通，估計開完氣轉此程會叻幾多。

　　「福喜」上場看好卻得第二，係咪彎位早走咗，唔排除有影響，事實上，此程也勝任，可追。「鎖定目標」和「神風先驅」也是可爭之馬。「正歡騰」按最近兩課的走勢，真係唔開胃。

第8場　第三班（80-60分）1200米

　　「軍刀」上場有揀，純粹係博博吓心態，居然擺前走有出奇地好的演出，如果唔係忽然又走樣，應可出頭。「大進」路程專家中的專家，唔揀係唔合理。

　　「賞蝦王」以一場1000米作熱身，即轉回此程，有心打快攻。「輕輕鬆鬆」係唔服氣上賽跟好位但返嚟唔多，情況一如「天之驕子」，所以，跟埋今次。「戰士」初出賺晒，直路卻一步都冇，唔敢追。「大把在手」、「紅褲子」和「太陽昇」可作三重彩腳。

第9場　第二班（100-80分）1650米

　　「歡呼星」剛仗全程形勢差到痺都有Q，絕對係能力的表現，轉場兼換人，無非求補中。「喜威寶」多場在拉士可爆段勁，加程只會更好。

　　「清風送爽」四平八正。「聖樂邦」初出前冇大閘，跑1400米仲要全程走啜腳地，輸唔遠已難得，按外地賽績轉到此程可能仲合適。「秘密行動」最近幾季當中，只得今季在初出之前有大閘安排，似有即搏意圖。「迎風起舞」重磅係唯一瑕疵。

第10場　第三班（80-60分）1650米

　　「勝任有餘」工夫做夠，進展比預期更快，立心一出即拼。「寶貝王子」贏開轉小何，計死數有賺。「活力奔騰」初出之前冇乜做嘢，全程走勢唔錯好難得，要追。「開心歡樂」上場跟得太快才會直路莫氣，回到此程效果會唔同。「不老英雄」如因應外檔而擺前走，效果唔會比上場好。