洪禮賢講馬：跑三班賽 高一線

博彩老头

　　第九場三班1400米。「高一線」季前操練的進程及進展幾好，但好還好，今季初出一役，在比賽過程中犯咗唔少錯，出閘唔利落係其一，其二，全程攞位唔多識慳，尤其係對面直路尾開始，揀第四叠推進，跟住仲要兜大彎，佢可以衝到最後100米（當時個勢以為贏得），其實係超額完成。此類霍廐成員，開氣後預期在進度上翻一番，假如騎者在演繹方面做番妥當，話晒上季尾初跑此程輸唔到1個身位畀「國寶」，佢喺三班點會唔聲大夾惡！

　　第十場二班1200米。如果認為「讚賞」上場之勝唔係本事，而係因為二馬「錢照贏」自己放快咗埋唔到尾，睇完分段時間，呢個觀點冇錯，但亦要明白成條直路「錢照贏」唔係任人魚肉，「自由勝」及「多贏勁駒」兩匹之後再出嘅馬，一樣追極都上唔到嚟，只得頭馬可反先，水準由此可知；今場雖然遇到幾匹跑開級際賽嘅一班馬，但只負112磅，未必讓得起佢，有權再W。