楝悉先機 陳華棟：

猪拉多纳

　　不得不相信，謀事在人，成事在天。阿棟千算萬算，啱啱嗰期快活谷日賽諗住條3串1位置真係中梗，過咗兩關仲唔掂，因為尾關係超過二百粒獨贏過關飛嘅「寶貝王子」，點知衰收尾，隻馬直路騎落去冇上次贏馬咁勁，唉，跌打茶都收唔番，真係一殼眼淚！希望今期呢三件生生性性啦！  

　　第一場五班1400米。「幸運來」上季早段未成熟，比賽時候常常有斜跑及難操控的問題，但到季尾就開始有表現，就算跑谷草都應付到，反映當時進度已起。再經過一個暑期，按理會更成長，何況，回降五班，對手惡唔出樣，有楊仔減埋幾磅，憑藉1檔之利，可以一放到底。

　　第二場四班1200米。「香檳歲月」計質素在四班實超，唔係靠嚇，我相信隻馬只要進度好，三班一樣有得贏。當然，季內初出未必夠狀態，唔可以咁實牙實齒。

　　加上，今場有隻老虎「父子兵」喺度，唔係咁易「𡁻」低，不過，呢場有好賠率，議博定先。

飛躍王子賽績唔曳

　　第九場三班1400米。「飛躍王子」上季跑親都唔入三甲，但冇一場輸得遠，賽績顯示到唔係唔夠班，可能係適應問題，因為見隻馬陣上成日留得唔暢順，好難穩定到。希望多了一個暑期的調校，在這方面會有改善。說到能力，在三班唔會冇得跑，始終曾經在二班跑獲殿軍，只輸兩個身位給「安御」，今次對手質次一皮，不難乘虛而入。

點買法

　　今期提供3隻馬都係有唔錯賠率， 睇隔夜賠率，冇一隻低過6倍， 咁值博，唔怕買3串7獨贏。如果揀買Q 嘅場合，第二場最好，雖然熱多少，感覺上穩陣嘛，5拖3、4， 睇落就係咁簡單嘞，唔覺會爆得啲咩出樣， 要重鎚，一於揀呢場嚟賭。