洪禮賢講馬：與勁高手繼續談戀愛

博彩老头

　　今次賽事柏寶又咁少馬騎（季內沙田賽期，以今期出馬最少），反觀韋達情況就唔同，8駒唔係細數目，當然，出馬多寡唔係同頭馬掛鈎，之但係，韋達對上兩期沙田賽事俱起孖，加埋，今次佢手馬又對辦，如果冇Ｗ落袋，賽果會係幾「摧毀性」！

　　第六場四班1600 米。「勁高手」一連兩場都係得三三四四，跑1200米如是，增程上1400米，名次仲跌一級，係咪高估咗佢嘅能力，個人覺得言之過早，如果今場跑到上1600米仍然贏唔到，同佢講分手都未遲！

　　睇番韋達連續兩場嘅處理手法，騎者並冇在留放上作出適量嘅慳吝，總之，兩役都係走三叠生位，點解會咁做？唔覺得係意識上有問題，主要原因係隻馬步幅唔細，兼且唔係易撻着，假如為求沿途節省腳程，硬係要楔位，令到佢開步唔順，又或是遲望空，出來結果只會適得其反。今場終於再加程，好明顯練者做法係面對現實，預期轉程可令此馬交出更強能力；話晒上季跑短途唔啱性能，有本事兩度上名，而嗰兩役頭馬，季內可在三班得ＷＱ，推算「勁高手」在四班唔會冇得贏！同呢隻馬一刀兩斷，定係譜出戀曲，今場會有答案。