洪禮賢講馬：Say no或令思路淤塞

博彩老头

　　抱着開明態度去接受任何事物，總好過凡事起晒「槓」，一面對新嘢就say no，冇得着亦會同時代脫節。肯去學習或了解自己知識範圍以外嘅嘢，某程度上可活化腦筋，通一通淤塞嘅思路，未嘗唔係好事。

　　譬如今季馬會整咗兩樣嘢，對馬友嚟講，多少對度馬有幫助，其一，係「賽日頭條」，每期賽事會拋出三幾個大方向（像剛賽「短途英雌遇王者」），就算未必喺大家嘅重點場次，知多啲冇咩問題噃！其二，賽日提供孖寶彩池高低水比較，雖然呢樣唔係新嘢，之但係，有總好過冇，加上，偶爾會出埋跑第二名嘅馬，孖寶射落下場嘅高低水情況，有時某些「無厘啦更」嘅冷門（譬如下場嘅冷門，無論射上場頭二名都低水），就喺咁發現到。

　　講開賠率啟示，今季馬經版整咗個專欄係關於上仗落飛馬，雖然唔係咩新鮮嘢，不過，該專欄個table偶有啟發性，有時賽後我會睇吓嗰批 table內之馬最終名次，察覺到上仗大幅落飛嘅馬，有部分真係跑出嚟，好似「愛睦善」，上賽最後5分鐘W賠率冇咗一半咁滯，結果再出補中嘞。當然，洪某唔係叫大家唔顧馬匹能力及形勢，但有時間嘅話，望吓嗰個表，或有「腦震盪」嘅功效。