洪禮賢講馬：眾人瘋狂 要識慌忙

猪拉多纳

　　跑完1/10賽事之後，有項數據爆攤嘞，隨着「天久」以極速捧走國慶盃，今季終於有連捷馬，但講緊都係得1匹咁大把！同日嘅「香檳王」、「好旺寶」、「陸豐福星」、「騰雲駕霧」等，統統冇得冧莊，前兩駒有Q還好，後兩駒連「披」都冇，1隻爆缸，另1隻直路腳軟，同上賽比完全係兩隻馬，點都刮傷到部分馬友。

爆路大局冇變

　　所以，就算連捷馬攤路爆咗，狀況只係由「危殆」轉為「嚴重」而已，唔見得有指標作用。其實，物極必反嘛，唔會跑極冇馬冧莊，但睇番近三兩季紀錄，嚟到今季初段，打叠好嘅為數特別少，箇中有好多原因形成，這種現象唔能夠籠統咁話因為加分後影響、賽事形勢緊湊等等，不過，我們知道有趨勢便成，隨而減低對某類馬嘅熱情。

　　始終市場就係咁，波馬股也作如是觀，熱哄哄場合，你撲埋去，想揩油水，可能揩着火水。總之，市場眾人瘋狂，自己要識慌忙，唔係刻意走小路，只係避免無謂犯錯。

　　話時話，騎師王仲未爆攤，上期殺出個近日幾多人討論嘅蔡明紹，賽前餐士面嗰幾位，韋達、柏寶及白德民，全部只係廿幾分埋單啫。有句說話幾有用，真係要審時度勢囉！