洪禮賢講馬：喜綵 試準長力

港陌

　　點睇今期都係韋達同柏寶單挑格局，前者略秤高多少，至少有三幾駒具爭頭馬本錢。而潘頓亦有幾匹揀手貨，有部分仲係有啲賠率，如果爆到出嚟，真係幾和味，不妨花啲時間諗諗佢嗰手馬。

重心場次　第4場 　第四班（60-40分） 1800米

　　「喜綵」初出際遇一波三折，出閘慢、中段跟唔住、拉士喺窄位衝，如果是但遇少一個難關，應該上到名。今次加程至1800米，表面上冇根據，其實上季曾經在田草輸近過，唔擔心氣量掹唔到；要是省過1場狀態起得更好，陣上唔係又咁落後，用番應有嘅跑法，唔難交出佳績。

　　「好旺財」剛仗咩都夾啱晒先可以贏得咁輕鬆，唔好以為轉歲後能力增值，由於目前磅頭唔重及好位，至會繼續揀。「心路」上賽蝕位仍然贏得清脆，雖然五升四班，對手係唔同，此類本有唔錯潛質嘅馬，一旦開竅，唔會1W收手。

　　「九龍寶」早已認定係呢程嘅馬，連跑兩場後肯轉場，心態向好，如果因換人令賠率高水，更加抵博。「瀟洒叻龍」慢地跑高好多，唔敢批死。「健康藍莓」１Ｗ後變酸，加上今場未必有形勢，能力打折扣。「緣是燦爛」已到危險分數，如果場地快，三重彩腳有得諗。此外，「經典再現」經歷1場論論盡盡賽事之後，狀態起得唔錯，大冷在此。

第1場　第五班（40-15分）1200米

　　「野馬」及「小蜜蜂」俱見暑期之後，情緒方面有改善，尤其係前駒，已有兩場實戰在先，進度升級，估計跑長200米仲好追；後駒近期操練前後皆乖巧，冇大量冒汗及焦急問題，進步好大，如果唔係季內初出，信心更大。

　　「齊齊掂」能力已見得九九十十，靠近況搭夠。「厲行星」較急情緒冇大改善，但初出一樣接近，降班係主因，今場仍有爭位資格。「聚豪精英」向來有不錯水準，排埋內檔更具危險性。「馬中神駒」此程不及1000米。

第2場　第四班（60-40分）1200米

　　「龍船旺」剛賽前對其狀態有點保留，跑來比預期好，而今次轉場有利無害，可看重。「飛魚駿王」上場有揀，跑落則比前規矩，既然今場整體條件冇大變，再追。

　　「中國好」唔係12檔必納入配腳之列。「好玩」同程排3檔及以內經常有好成績，假如省過1場有番足夠前速，隨時帶到。「當旺」和「成功年代」只宜作T或F之選。

第3場　第四班（60-40分）1200米

　　「好玩神駒」上賽內閃嚴重仍可在此程入P，而該役水準唔錯。今賽對着一批較水皮對手，可出頭。「芙蓉威龍」縮程要適應，但級數遠比對手高。

　　「日月暉華」追開，返細場冇問題，再畀機會。「高升」工夫上冇悠悠閒，唔似一般此廐馬嘅散漫態度，唔似熱身格。「駟馬難追」1檔又夠快，如有地利仲啱放。「一路順風」一日未喺陣上聽教聽話（剛仗內閃嚴重），依然未到捧場時。「財源來」剛仗演出稍遜預期，寄望省過1場有所提升。

第5場　第三班（80-60分）1650米

　　「闊袍大袖」試跑情緒冇上季咁奔放，收斂咗係好現象，而最後試跑所見，回程時仍好氣好力，反映此際唔係收斂咁簡單，態況也並進。而之前試埋谷閘有晒誠意，初出已具贏面。

　　「賞蝦王」堅持近況OK，或是路程未配合，呢次轉到一哩，畀埋最後機會。「寶貝王子」上場跟好位返嚟冇得衝，係咪前仗耗力多咗？唔使深究，回一回可能又返嚟。「包裝好友」輸在同場多馬跑法一樣。「寶成智星」唔易駕馭，安國倫未必勝任。「靚到爆」多馬走早段扯得快，形勢啱佢。

第6場　第三班（80-60分）1650米

　　「睡得好」跨季兩W姿態同樣誇張，上番半班唔會失勢，有權三捷。「好兄弟」唔係小何能舞得掂，換上柏寶效果應該唔同晒。

　　「財駿福星」剛仗輸在跟得急，名次落後唔使理，總之狀況冇問題，換人轉場地，有晒下台階。

　　「玩具神話」和「哈哈大少」進度比前三駒略次，爭腳居多。「奄尖大少」只係擔心此廐新勝馬冇兩鋪。

第7場　第三班（80-60分）1200米

　　「浚鋒天河」係擔心停課帶來幾大影響，計級數好惡。「威威財星」1檔加地利，具冠軍相。

　　「高飛飛」上季尾轉型成功，教到留後追，進度亦承接到。「卡加精神」級數稍低，充其量作腳。

　　「駿蹄飛」收身未夠，係跑路程性能。「御將軍」狀態未趕得起。「紅褲子」如非12檔，或有邊線機會。「常山鳳寶」9檔太大影響。

第8場　第二班（100-80分）1000米

　　「寶樹友盈」近況未到最好，不過落班會有一定優勢。「桃李滿門」又係未夠，但路程性能好靠得住。

　　「酒勝」轉場有賺，贏開不宜睇小。「風之子」暑後遲復課，進度差一線。「孖寶神駒」做得夠才上陣，加上降班及好位，有冷門機會。「喜萬家」外檔及多馬搶，形勢唔就。「海之宏」捧場與否，臨場情緒定奪。「金紫荊」12檔不易像上賽輕易前領。