內圈探索：高飛飛有暗火

港陌

　　今晚谷中上演八場賽事，苗廐雖然上陣馬不多，但參戰馬頗具分量，其中以「睡得好」與「高飛飛」兩匹當起馬最具實力，而且均交由馬偉昌執韁，今季此對騎、練合作成績佳，今回隨時又可再添頭馬進帳。

居三班有着數

　　先講出爭第七場三班1200米的「高飛飛」，上仗季內初出角逐同程，在梁家俊胯下後上入Q，當時其狀態僅屬初起，而且馬身仍肥，能有此表現反映居三班有着數。五歲馬拼後續做工夫，埋門連課快試考驗，走來朝氣勃勃，日前踱步所見暗火湧現，經過一場實戰後，狀態明顯已到位。今回再戰谷草1200米，回配贏馬拍檔馬偉昌，補中機會甚高。

　　至於出爭第六場三班1650米的「睡得好」，上仗季內初出即在同程大勝亞軍「多贏勁駒」四個多馬位，順利取得跨季孖寶，贏馬後被重加13分，可見備受重視。北半球自購馬已完全適應水土，現評分依然有利，復課後工夫未見放緩，勤操下勇況更盛，埋門踱步狀態亦對辦，今回再跑強項谷草一哩，再贏冇難度。

家明