周氏叔姪孖寶好風光

港陌

呢一邊廂「好辣椒」先幫馬主周錦泉攞到久違嘅頭馬，到咗第六場輪到馬主周嘅姪仔周漢文攞威，佢嗰隻「雨電風雷」卒之喺潘頓胯下開齋，兩叔姪難得齊齊贏馬威威，意義非常重大。
       

講開呢隻「雨電風雷」，當年周漢文一心諗住引入嚟補替前馬王「爪皇凌雨」，可惜呢隻馬上季嘅表現麻麻哋，跑咗十場只係攞得一個亞軍，搞到馬主周都有啲失望。
       

不過到咗今季，似乎「雨電風雷」比之前成熟咗，尋日季內頭鋪即贏田草千六，認真唔簡單。周漢文賽後講愛駒今季晨課懶性好重，唔係咁容易上口，所以佢覺得唔係好啱南非騎師嘅韁繩，反而一早卜定潘頓呢個澳洲騎師，結果真係換人得手，佢仲話只要保持進度，上番二班都冇問題。