洪禮賢講馬：甜將 升班照贏

魑魅魍魉

　　今日賽事係換咗冬草後第１次跑田草，通常都係利擺前走嘅馬居多， 如果雨勢持續，後上馬將會更加不利。今日馬偉昌坐騎唔多，但件件有能力，白德民馬多又惡， 呢兩位騎師要重視。

重心場次　第9場　第一班（110-90分）1400米

　　「摩法神采」跑法可能喺今日不利，信佢級數搭夠，事實上，剛仗直路唔係滋滋油油，有Ｐ都唔奇。熱完身肯在配件作變動，可以話贏就贏。

　　「飛銀動力」上場係咪拉士鬆韁繩，都未必改變到賽果，因頭馬沿路走位已經賣大包。本身係有晉身級際賽嘅潛力，上班唔怕，預期開氣後會更惡。「雅雪」由上場「天久」、「步步穩」，轉成此批一班馬，賺晒差價。

　　「藍天」準到冇朋友，加罩縮程亦唔會有問題，但要注意則係臨場情緒忟忟哋先好。「好友福」太被動跑法唔着數。

　　「加州萬里」漏閘仲可以贏到拋甩對手，係超乎想像，問題係呢批對手比上賽高一班有多。「確叻迅」上場直路喺馬林緊迫，衝得好唔順，仲攞到第四算叻，邊線對象。

第1場　第五班（40-0分）1400米

　　「晨速」近試好好火，入Ｑ後進度再上，如果肯保持前領跑法，有權帶到。「野馬」係跑法唔鍾意，計馬唔比前駒曳。

　　「小鬥士」唔係小何舞得掂，上場唔係早段hold唔住，用多咗力，拉士唔會畀人任過，換得巫記，心態向好。

　　「無敵鷹王」只要唔再情緒不安，肯更投入賽事，已有權上名，因上場直路其實好好走勢。「奪寶群英」和「嘉寶神駒」又係受制跑法。

第2場　第四班（60-40分）1400米

　　「雙龍出海」上賽前冇大閘又遲開操，一樣有Ｑ，比預期跑得好，而往績顯示，佢有鋪打叠好嘅癮，值得追。「辣得喜」加程冇問題，只要性情冇話突然波動就得。

　　「信賴」狀態唔錯，係上場零零舍舍跑得差產生戒心。「大地王者」轉來此程未必夠氣量。

　　「香檳歲月」上賽前不在狀態，輸唔遠係分利嘅表現。「超力駒」長期賺分，但經常冇走勢，希望轉配件有刺激作用。

第3場　第四班（60-40分）1000米

　　「父子兵」及「魔幻大師」級數及前景係同場最好，排外檔，跑線又有利，頭馬非此即彼。

　　「喜盈門」係少數此馬房初出即上名嘅馬，但今次跑線的形勢與上場唔同晒。「好歌」向來襟搏，贏完有賠率，仍可再拖。

　　「領航人」上場唔係畀「麗晶之星」斜出影響，點都會有Ｐ，當然，要期望佢喺今場贏埋就難多少。「天賜福星」操好賽劣，觀望為上。

第4場　第四班（60-40分）1200米

　　「香檳王」實力在目前分數已冇大優勢，只係狀態搭夠，同埋，排檔幫到跑法。「快意」剛賽唔知發生咩事，一步都冇，但前仗實實在在與前駒串Ｑ，今次縮程，冇理由唔畀機會。

　　「普渡馗」不幸估中上賽的處境，寄望開氣後在陣上能聽使。「旺當家」賽前覺得未夠，但臨場外觀幾好，退出則係之後喺閘內發生嘅事，呢次有賠率可先博一注。「尊皇騰龍」冇改變過跑姿繃緊嘅毛病。「好辣椒」應該未見晒，回班、磅輕加埋地慢，仍然有機。

第5場　第四班（60-40分）1800米

　　「善風」上賽前已指出狀態起咗，只係驚路短，一樣衝到入Ｐ，表現好過預期。今場肯回到強項，有心交代。「萬子千紅」尊重連勝近績，正路腳。

　　「壽比南山」跑到第三回合，理應夠跑頭。「招財名駒」唔叻，卻有場地及跑法之利。「精密紡」長途種，1800米應該得，地慢對佢又唔會構成影響。「實業傳奇」連敗兩場，已沒有藉口了。

第6場　第三班（80-60分）1800米

　　「一言為定」和「包裝選擇」4歲仔冇咩好諗（除咗爭分），既然彼此準開，1800米又唔覺有難度，成熱亦冇得拗頸。

　　「利好」等加番眼罩好耐，跑到夠，行得呢步，已有決心，地慢則有少少「窄」。「活力奔騰」和「綠色超凡」未必夠贏，但計實力可有Ｐ。「神風先驅」上場直路大好形勢卻腳軟，的確失望，但秤番分數及磅頭，唔係冇得爭。

第7場　第三班（80 -60分）1200米

「甜將」和「錢照贏」，真係兩公婆見鬼，唔係你，就係我，單Ｑ悶局。「勁飛寶」外地大勝1W後運港，質素如何屬未知之數，純講試閘唔算吸引。

　　「孖寶皇」又係同前駒一樣（1場即勝），稍唔同係佢上季落地後早開操，而今季試閘有好嘅轉變。

　　「好心星」退出後翌日操得番，唔會有大問題，雖然試大閘走勢勉強，或是場地性能作怪，季內初出有賠率，博得過。「多多昇」唔係地慢會考慮。「談笑用兵」縮程對呢匹均速馬係好，但擔心之前缺課。

第8場　第一班（105-80分）1000米

　　「萬事佳」及「小橋流水」論前景，後駒看俏，因前駒已一再證明唔易再突破，不過要在此場入Ｑ唔難。

　　「共創未來」最後試跑那課好吸引，係唔知地慢會唔會打折。「永寶駒」及「酒勝」可以跑速度，又可守好位，形勢唔錯。「紅衣司令」直路賽向來唔多啱發揮。

第10場　第三班（85-60分）1400米

　　「讚惑」跨季幾場冇邊場跑得唔好，上場升班和加程都克服到，手上仲有好多分未兌現。「精英財星」及「人人興旺」實力未必比前駒失色，如賠率懸殊，更加抵博。

　　「川河勁駒」1400米可應付，係配搭奇怪。「伽羅」初出有獎金好犀利（出閘被撞、難穩定兼斜跑），加程對發揮好好多。「金堡龍華」跑法會賺，但贏要則唔易。