高清睇跑馬：皇帝旨令又贏得

魑魅魍魉

　　「皇帝旨令」過檔摩廐後脫胎換骨，最吸引是改為鬥後勁的威力大增；前仗轉倉初出即勝後，接戰於總場次125的高分四班賽再下一城；該仗排四檔起步，入直路時一度被困，然而白德民絕不心急並在內檔等位，結果拍住多駒於窄位一同衝刺，盡顯強勁鬥心，突圍後鞍上人知勝利在望，故未打一鞭過終點，然而跑出 1.22.0，足足較前仗快五線，進步之大可想而知。難得今仗仍在四班上陣，同場亦冇一匹於今季贏過，形勢大好三W在望。

　　「快樂小子」上季於總場752跑田草1600米，全程外叠兼入直路衝刺時外閃，成熟程度未足下仍跑第三，難怪今季三仗次次捧成熱門；上仗於總場次123入Q，走勢一樣論盡，沿途搶口兼曾勒避，人馬要重新取得平衡；更慘是入到直路又被困，直至過了二百米先能望空衝刺，可見先機盡失，加上被負輕磅的「寶利多」走甩，結果後追不及僅得亞軍。睇番末段走勢勁如炮彈，筆者敢寫包單，若非牠太遲望空，又或者早段冇搶口及勒避，戰果肯定已改寫，並隨時以輕鬆姿態贏馬；巫斯義最擅長騎後勁馬，有力補中。

Sam