高清睇跑馬：萬人迷評磅員重視

猪拉多纳

　　第二場四班泥地1200米，「萬人迷」上季已一再跑近，可惜慢閘毛病實在太嚴重，就算好幾次冇慢閘，前速亦欠奉，跑到季尾一戰，仲要跑到心律不正，前景麻麻。

　　但今季首戰泥地短途立即落飛搏殺，雖然力拼上名，但慢閘毛病未見改善，早段也要推騎才勉強跟得上，最終跑入季，上仗落五班角逐總場次142泥地 1200米，未有慢閘不特止，尚要極之快閘，起步立即撲出，而且早段輕鬆咬住前列馬，不再過往的懶洋洋，入直路走勢更勁如炮彈，一度被困直至二百米才望空，照贏可也已經誇張，而且一鞭冇打，馬偉昌只係齋推，亦因為以超班姿態贏馬，加上負重磅出戰，五班頭馬賽後罕見被重手加九分。既然評磅員看好，周日升班爭勝途，可再下一城。

皇帝旨令末段勁

　　第三場三班草地1600米，「皇帝旨令」上仗大熱死火，當然失望，不過睇番該戰步速慢到離譜，「氣定神閒」極之搶口都唔肯領放，只有「雙龍出海」同「莫己若」主動少少，兩駒自然佔盡步速之利，再睇第三段步速嚇了一跳，雖然當日未有1400米路程可比較，但第三段跑出24秒6，比起該日1600 米仲要慢，最慘情是白德民直路堅持走內檔，慘被圍困難以望空，加上步速不利，「皇帝旨令」依然追入第四名，並造出全場最快末段時間，確認升勢未止，仍有進步空間，再看之前兩戰輕鬆取勝，莫講三班，相信殺上二班亦有力言勝。今日升上三班負輕磅，加程跑1600米更合腳法，有力補中。