高清睇跑馬：中國好增程開齋

魑魅魍魉

　　「浪漫添馬」上季在沈集成馬房時已跑得好，到上季尾轉去苗廐發展一樣有好演出，轉倉初出即在總場次617的谷一哩贏馬省靚招牌，其後兩戰屈居亞席，但同樣以短距離見負，其中不敵「駕世鞍」一役，在步速超慢下後追不及，純粹輸形勢。

　　暑期休養生息後，「浪漫添馬」今季首戰即勝反先「駕世鞍」，最吸引是末段一度被「濰坊」追過，依然可以力拼反先，盡顯強勁鬥心。上仗升班出戰谷草一哩，繼續有好表現，從後追入一席第三名，若非排九檔早段被迫留到最後，以其強勁衝刺隨時已可後發先至。再睇「浪漫添馬」末段造出23.79秒，屬全組之冠不特止，更足足快過頭馬「駕馭」七線，反映後勁絕不簡單，今番繼續出戰谷草一哩，同場又有快馬在陣，絕對有力後上補中。

除眼罩跑仲好

　　「中國好」上季跑過兩次第五，該兩場頭馬係「一言為定」同「威德妙」，賽績尚非太差。今季首戰跑尾二，可能是加罩出戰不習慣，接戰除去配備即跑第四。

　　上仗總場次131，「中國好」縮程跑谷草1000米，出閘雖然不算快，但在都爾催策後即進佔內欄包廂靚位，末段撻着後走勢甚勁，但始終路程嫌短，最終仍力追不及，以半個馬位不敵頭馬「皇仁神駒」，但蹄下敗將「駟馬難追」、「開心好多」接戰分別贏馬及上名，反映賽事水準甚高。今仗此駒增程跑 1200米更合發揮，排五檔起步不俗，隨時成為郭能開齋馬。

Sam