童夢先拔頭籌 阿叻擊掌

魑魅魍魉

阿叻陳百祥啱啱度過60歲大壽，前日喺沙田馬場馬匹亮相圈開生日派對，老友之一練馬師何良梗係有份到場贈興。除此之外，良哥尋日再以頭馬做賀禮，憑住「童夢」先拔頭籌，賽後叻哥搵良哥擊掌慶祝，應該大有斬獲。「童夢」上季跑咗六場都冇嘢睇，今次季內初出兼第一次跑泥地，閘前居然落到6倍着「綠格」，果然飛到馬到大勝對手三馬位。何良指呢匹馬上季未成熟，脾氣又暴躁，所以一路無乜表現。既然係咁，良哥索性等到隻馬成熟先跑，賽前刻意戴眼罩試多課泥閘，仄準晒先至出賽，如今順利得手，證明無白費心機。良哥仲話，「童夢」唔一定淨係識泥地，日後轉攻草地都問題不大。