洪禮賢講馬：雪山神駒冇阻力

港陌

　　第六場三班1650米。上場前曾指出，「雪山神駒」季初首回合根本未夠狀態，名次普通唔意外。而經過熱身後，練者對佢態度完全唔同，大閘、拍跳、落草地，入肉嘅工序全部齊晒，進度隨之照單全收。當然，「雪山神駒」贏得輕鬆係bonus，估唔到人馬可以夾得咁好，至於締速方面，屬今季班內同程中上時間。今仗上番三班跑，對手唔再係「浪漫添馬」之流，但細心睇吓同場嗰批三班馬，季內賽績好堅嘅，其實有限數（只得4駒曾入P），既然阻力唔算大，而佢又喼到上場嘅「方」，要再喺前列返嚟唔係難。

　　第七場三班1800米。「好旺財」4戰此程得3W1Q，往績準到冇朋友，今回初上三班會唔會即刻冇運行？唔鍊過，唔可以一口咬定。如果睇番操練準備，練者冇當升班係咩一回事，完全冇欺場味道，整套工夫充滿拼意，期間唞番夠，而工序亦充足，近況仍見企穩作戰水平；上場締速雖然係今季10場此程最慢，姿態又冇之前咁易，但要知道該役發力點係比前兩場早咗，仲要孭住130磅，時間唔快並唔係冇得賴。今仗升班減負11磅，更好彩到抽埋夾開嘅韋達，就算贏唔到，要入圍都唔係難。