高清睇跑馬：多多寶馬賽績堅

猪拉多纳

　　「多多寶馬」上季初出於田草1200米後追如箭跑第四，再出即在總場次229補中，亞及季軍「傾力之城」及「滙名燈」之後均有馬贏，可見賽績優秀。接戰未能添食跑第二，但不敵一季六捷馬「勇敢小子」冇得好講；久休九個月後今季於總場次93田草1200米復出，捧成大熱下輕取「高風格」及「海王子」贏馬，而上仗在總場次194初跑二班1200米，步速完全不同下亦跑第三，頭六名馬除「橫掃千軍」再出跑谷草劣檔冇影外，其餘「富高勝」、「高點」、「飛闖」及「奇異福星」翌戰均非勝即位；這次「多多寶馬」落番三班可謂虎入羊群，均速馬轉爭谷草應合，坐位望贏之選。

　　「闊袍大袖」季前曾贏谷閘，果然今季首仗即於谷草1650米打開勝門，該役亞軍「靚到爆」之後兩捷便知其實力雄厚。兩駒上仗於總場次202的谷草一哩再遇，排十檔的「闊袍大袖」全程居外叠，劣勢下被「靚到爆」反先乃非戰之罪。「闊袍大袖」現評分仍有優勢，今戰有「歡騰」、「愛睦善」等前領馬在陣，預計步速必不會慢，配合葉廐強陣而來，值得投予信心一票。

Sam