洪禮賢講馬：高一線剛敗有意義

猪拉多纳

　　2010年送歲賽，一如近季，賽果爆得吓！冷W1隻接1隻，全日埋單計數，7隻大熱門冇影，贏到嘅只得「森淼獵鷹」及「曬冷王」，佢哋仲要係掹掹緊咁贏，得嗰十幾廿蚊W，邊夠買驚風散，所以，來年送歲賽，可能繼續係冷門至上，熱門痴心妄想。

　　至於元旦賽個trend，與送歲賽比較，係兩個唔同世界，睇落係熱門馬當道，就以對上兩年為例，09年跑11場，冇1場頭馬賠率喺9倍以上，大熱門如「海力童」、「樂意洋洋」順利勝出。到咗上年同日賽事，二三十蚊W 為數亦唔少，「好心星」、「蓬萊仙子」、「再領風騷」等等，排住隊返嚟。到時唔係有咩「依郁」，趨勢還是「熱食」吧！

　　事實上，除咗因為元旦賽事傳統上利熱門，只要望落今期報名表，唔少預期會熱起上嚟嘅馬，估計到時可交到貨，剩係大摩馬房嗰堆，至少有三幾駒係熱而穩。

　　此外，霍廐同樣係大陣仗，單係正選報名馬已經有9匹，查番呢個數目，係佢今季出得最多嘅1期，如果1/1雷聲大雨點小，咁就冇法子，若不，以佢手馬嘅分量，唔難爭取成績。像三班1400米「高一線」，上場跑到冇P，睇完O咗咀，要怪責騎師取位定係際遇，已經冇意義，但呢場敗仗卻帶出兩點正面之處，其一，經過前仗賽後發現呼吸有異聲，復出係跑得番；其二，目前負重磅在三班冇有怕。所以， 今場再跑1400米，如發揮唔錯得過上一場，至少P有望。