洪禮賢講馬：安鞍戰意十足

猪拉多纳

　　2011年來臨，希望大家新年有新景象，開開心心，生活自在，喺馬場成日都咁旺。至於講到今日主角，唔係摩白，就係蔡韋，呢兩對騎練今日大軍壓境，大膽假設，可能有一半頭馬會係佢哋包辦。

重心場次：第4場　第三班（80-60分）1200米

　　「搏得分」取位論盡，兼大部分途程聞人屁股，令到上場只得第五名，但卻顯示到佢一定有班，累積了兩場直路賽之後，終肯轉路程，係時候再睇佢多啲。

　　「旺當家」上場由出閘已經開始蝕，蝕到入直路仲可以跑到個Ｐ，三班點會唔夠，呢場排4檔，冇理由跑得差過上場。「奇葩」及「勝利旋峰」唔係冇實力，只係近績失望。

　　「如日方中」做番好多嘢先再跑，咪以為冇企圖。「滙名燈」負重磅漸漸冇優勢。「至尊飛飛」好位幫到，有權爭前列。「戰士」如持續到應有表現，回到1200米仲好。

第1場　第五班（40-10分）1200米

　　「駿盈」落入此班有優勢，但133磅及8檔對佢則唔係冇影響，要發揮及際遇啱晒才有贏面。「小蜜蜂」有時仲係癲癲哋，轉配件睇吓幫唔幫到，純粹以佢嘅速度，唔係同級馬可比。

　　「華劍寶」重磅有壓力，惟同場好多馬揀唔落手，唔係冇Ｐ望。「揀得準」入到東廐，五班都收，好戲在後頭。「齊鼓掌」好多時跑心情，由於向來陣上操控差， 綁脷可能有幫助。

　　「大地神駒」1200米擔心追唔切。「高駿」跑了兩場皆比預期失色，但長期有分，冷門唔怕拖。

第2場　第四班（60-40分）1400米

　　「醒目精英」曾力鬥「領航人」及「好得意」，後兩駒加埋已攞４Ｗ，佢在此班實超，問題係14檔及又加磅，進度趕唔趕得上！？「軍士」唔再跑唔啱嘅場地及路程，叠埋心水返1400米，仲喺配件上作出變動，如交出上季B+2欄同程僅負「八逢九紫」水準，應贏。

　　「自由萬歲」最近大閘明顯比前冇咁亂及定啲。「偉感」檔靚，或賺形勢。「中國好」預咗上場唔會好，但回一回情況唔同。

第3場　第四班（60-40分）1200米

　　「多利皇」大閘見好，血統早熟，件綵衣亦喜打快攻，初出已要重視。

　　「天賜福星」剛仗忽然走樣，唔知係咪同直路早段被撞patpat有關，總之，前仗幾乎贏到，四班點會唔超。

　　「萬事綵」冇檔會差好遠。「好辣椒」入Ｑ難度好高，但要尊重上場賽績。「新三刀王」連仗輸近，但嚴格嚟講，上場直路冇乜加速力。

　　「消費王」落班等佢跑谷草中長途至落叠。「閃耀小子」喺陣上開始冇咁錯，有賠率建議博定先。

第5場　第五班（40-10分）1400米

　　「嘉寶神駒」、「晨速」及「百威紀錄」俱認為在五班有分量，前駒喺近績已證明晒，後兩駒由於有輕磅，以及排檔不錯，機會或更佳。

　　「風馳電掣」長期有分，但長期跑唔出水準，就算轉程更好，只宜拖腳。「勵盈」近期工夫算係做得辣，五班1400米好手或復現威力。「森淼盛」和「德雲歡欣」近仗有表現，邊線腳。

第6場　第四班（60-40分）1600米

　　「得力助手」及「金瑞」跑法近似，位好會教埋點跑，如真係食到形勢，對手不易追。「卡加大師」唔係因上場賽後被問話打窒，落四班好惡。

　　「黃金褭蹄」加程係好，但從對上兩役已知道重磅有影響。「飛躍之旅」四班1600米係班頂馬。「金鑾大殿」剛敗有晒借口（出閘唔好及直路被塞），如仍相信佢係超級，14檔仲好分，更抵博。

第7場　第三班（80-60分）2000米

　　「包裝選擇」及「勁高手」賽績令人有信心，但同時亦亮了紅燈，因磅重、累積升幅、搏攰等等，太熱唔值博。

　　「中環英雄」上場冇前仗咁蝕，就可以在此程上名，能力已見升值。「綠色超凡」轉到跑法，變相令實力進步。「友運行」及「我愛您」級數比前幾駒較遜，位望。

第8場　第三班（80-60分）1200米

　　三駒控制大局；「爪皇盛水」剛勝掹掹緊，只因騎者錯得交關，把發力時間推得太早，希望今次14檔，唔會令騎者又犯錯，純計馬匹實力，三班好超。「如願以償」唔加程，其實有風險，尚幸轉場會幫到多少。「馬之王」如冇病冇痛又跑得，係三班巨人。

　　「肥仔糖」泥閘試得好、「駕寶」開完氣，可能有威脅。「六六精英」已放手，多減分才算。

第9場　第三班（80-60分）1400米

　　「高一線」剛敗有雙重意義，證明呼吸有異聲後，隻馬跑得番，同埋，目前重磅仍夠爭。期望今次走位唔好比上場論盡，三甲梗有。「紅日」休出表現遜預期，或是之前缺課有關，重新開氣後，宜再畀機會。

　　「好得意」及「蜚聲」實力比前兩駒為低，爭腳居多。「傾力之城」轉馬房首仗跑得唔錯，但其實賽前工夫斷過幾次，跑到殿軍好叻！值得跟進。

第10場　三級賽　1400米

　　「共創未來」返回1400米，威力比短途勁得多。既然上場G1，喺hea 住hea 住情況下，返嚟都第四，如呢場處理嚴謹，贏面大。「小橋流水」初跑此程或削弱實力。

　　「好友福」頭罩幫唔幫到係兩睇。「雅雪」多馬一齊走， 唔易應付。「競駿精英」好heart，唔夠態亦有權近。「勝眼光」路短但有卡士。「萬事佳」及「高點」對手及形勢已不同。

第11場　第一班（105-80分）1600米

　　「安鞍」犯不着要留在一班跑1600米，上期就話要讓路，呢次冇必要，所以，跑得唔會冇企圖。而今次再試1600米，效果或比上季好，因上場末段走勢略見均速了。

　　「軍事攻略」唔係阻礙，初出已上名，可見插班分數有so。

　　「沙貝利」及「加州萬里」贏面唔大，爭Ｐ格。「紅跑車」輕磅，卻輸卡士，三重彩腳。「智友」準開，惟轉場及升班，稍有難度。