洪禮賢講馬：有買早冇買錯？

猪拉多纳

　　股市與樓市，唔少投資者嚷着：「有買貴，冇買錯。」唔理邊隻股票，計該公司市盈率、資產淨值、盈利能力等，明明現價大折讓，未反映到真實價值，抵買噃，理佢現價係52周新高，或掛牌以來歷史高位，一於追貨，希望總有1日到價（可能係夢盈率，成世上唔到去）。

　　樓市又點呢？摸貨咩！唔怕噃，XXX出招要樓市降溫，雖然成交即縮，其時有部分貨主即減幾個%去散貨。但息口低企大過天，轉頭大家唔記得，買賣交易要畀額外費用，繼續炒，港島區、新界貨，過萬蚊1呎照掃，貴咪貴囉，火棒會「薪火相傳」，唔難甩手。

　　賽馬遊戲，又會否奉行「有買貴，冇買錯」？嗰隻馬10倍就值博，但W賠率得5個開，買唔買？認為唔值博，放棄下注，但最終跑出嚟，其實冇得怨，因為唔啱數，與其要買貴，倒不如博少1隻，另覓合理值博馬匹。

　　那麼「有買早，冇買錯」，又係咪存在未來盈利價值？按近期個trend，又好似錯唔得去邊！？所指「有買早」，並唔係叫大家求祈搵啲馬買早1場先，而係上仗落飛馬（最後數分鐘W逾25%跌幅）翌仗所帶來嘅得益。

科研精英重飛得手

　　像元旦日頭馬「精英財星」及「好得意」，之前嗰場W臨尾跌幅均逾4成，反映某撮人「買早」了，卻「冇買錯」，更何況，「好得意」仲係連勝。而剛周三夜賽，有4匹頭馬又喺類似情況下勝出，「科研精英」更是經典中嘅經典，連仗兩場W跌幅超過5成，呢次有6倍，而Q及QP仲成行唔係啡就綠格，和味嘞！