寒冬傳暖意 安哥賴仔 重返凱旋門

猪拉多纳

近日天氣嚴寒，昨晚跑馬地氣溫不足十度，馬場內卻傳來陣陣雪中送炭的暖意。賽前排包尾的黃汝安，憑「駕世鞍」取得今季第三場頭馬，並打破近八次賽事不勝之悶局。那邊廂，季內手風欠順，經常搏殺屈居亞軍的賴維銘，停賽復出即替「尊皇騰龍」開齋，並為自己取得自去年11月17日贏「海王子」後，近十五次賽事首場勝仗。
       
尊皇騰龍七戰田草四度入Ｑ而未勝，昨晚初跑快活谷即成功開齋。

早前有流言傳出黃汝安將於季內提早退休，安哥立刻矢言否認之餘，並以實際行動闢謠，昨晚於第二場五班谷草一哩憑「駕世鞍」爆出28倍冷W，並為馬房取得今季第三場勝利，而鞍上人都爾亦打破逾兩個月冇馬贏的悶局，可謂別具意義。
       
駕世鞍中段發力突圍得手，黃汝安大讚鞍上人都爾發揮醒目。

季內集中於田草上陣的「駕世鞍」，今仗突然改跑快活谷，賽前更做足工夫，結果轉場得手，黃汝安對此部署有以下解釋：「由於『駕世鞍』的馬主一直希望愛駒於沙田出賽，因此季內四戰均跑田草，可惜無甚突破，遂決定返回一向有好表現的谷草一哩，結果變招成功。其實賽前已吩咐都爾早段跟前一點，但馬匹出閘有意外，幸好鞍上人醒目，懂得中段發力，發揮值得一讚。」
       
呂健威贏尊皇騰龍畢業

賴維銘早前策騎「馬主光輝」犯規被罰停賽兩日，昨晚復出馬上交出好成績，第四場夥拍「尊皇騰龍」報捷，除了為這匹配售馬打開勝利之門外，更替呂健威贏夠十三W順利畢業，可說是雙喜臨門。
       

「尊皇騰龍」以往在沙田經常上名卻未勝，今初跑谷草馬上開齋，呂健威當然滿意。他說：「此駒曾有嚴重腳患，因此休養過一段長時間，幸好馬主夠耐性才可以繼續服役。今季復出表現理想，趁有佳態轉來谷中一試，果然能憑藉良好速度打開勝利之門，既然馬兒身在細場表現良好，稍後仍會集中在這邊上陣，相信仍會有頭馬見面。」